Hemserekanê Şaristanî yê Adana, Mersîn û Antalya yê DEM Partî seba ke Abdullah Ocalanî heqê hêvîye ra îstîfade bikero, veng da û va tecrîd dewam keno û ganî Ocalan bêro muhatabgirewtiş.
Hemserekanê Şaristanî yê Adana, Mersîn û Antalya yê DEM Partî waşt ke goreyê qerarê AİHM’î yê “heqê hêvîye”, serekê PKK’yî Abdullah Ocalan bêro veradayene.
Serekê MHP’yî Devlet Bahçelî 22ê teşrîna verêne de kombîyayîşê grûba partîya xo de vengdayîşêk kerdbî ke wa Ocalan bêro TBMM û rêxistine fesih bikero û heqê hêvîye ra îstîfade bikero.
‘Tecrid sucê merdimîye yo’
Hemserekanê Şaristanî yê DEM Partî derheqê tecrîdê vera Ocalanî qisey kerd û waşt ke tecrîd bêro vindarnayene û seba ke meseleya kurdî hal bibo gamî bêrê eştene. Hemserekê Şaristanî yê Adana Seyfettîn Aydemîrî va ke tecrid sucê merdimîye yo û meseleya kurdî ganî hal bibo.
Hemserekê Şaristanî yê Antalya Ihsan Nergîzî va ke tecrid Îmralî ra heme hepisxaneyan û komelî ser vila bîyo û ganî Ocalan bêro veradayene. Hemsereka Şaristanî ya Mersînî Bedrîye Kuş zî va ke pêvînayîşê Omer Ocalanî hêvî vila kerdbî la no nêbî.
‘Ganî rêzdar Ocalan bêro muhatabgirewtiş’
Kuş va ke komelî de sebebê heme probleman polîtîkaya tecrîdî ya û wina dewam kerd: “Ganî qerarê AîHM’î bêrê caardene û Ocalan û hemê girewteyê sîyasî bêrê veradayene. Ma reyna humatê AKP’yî ra wazenê ke Rêzdar Ocalan bêro veradayene û bêro muhatabgirewtiş.”
