Bi talîmatê Walîyîya Îzmîrî, hetê zabitayanê Şaredarîya Konakî yê mohrkerdişê Komela Cigêrayîşanê Ziwan û Kulturî ya Avestayî rê Hemverfekê Komîsyonê Ziwan, Kultur û Hunerî yê DEM Partîye bertek nîşan da. Hemverfekan va ke ê vera hêrişê aştîya ziwanê qebul nêkenê û qedexeyanê ziwanî rê nê, aştîya ziwanî rê eya.
Bi talîmatê Wezaretê Perwerdeyê Neteweyî û Walîyîya Îzmîrî, hîrê roje verê cû zî polîsan eştîbî komele ser û bi bexaneya ke ruhsatê komele çin o gefê girewtiş û mohrkerdişî wendîbî. Vîzîr zî saetanê sersibayî de 2 zabitayî ameyî komele û komele mohr kerd.
Ma zî sey Ajansa Welat na mesele ardbî rojeve. Xebera ma ra pey nê nêzdîbîyayîşê Şaredarîya Konakî, Walîyîya Îzmîrî rê Komîsyonê Ziwan, Kultur û Hunerî yê DEM Partîye bi eşkareya nuştekî bertek nîşan da.
Eşkeraya DEM Partîye wina yo:
“Ma hêrişê vera aştîya ziwanî qebul nêkenê
Walîyîya Îzmîrî semedê mohrkerdişê Komela Cigêrayîşanê Ziwan û Kulturî ya Avestayî ferman da û Şaredarîya Konakî zî berê komale mohr kerd. No, vera aştîya komelkî û zafrengîya ziwanî de derbeyêka eşkera ya. Na komele serra 2018î ra nat bi ziwanê Kurdkî û ziwananê binan de fealîyetanê perwerdeyî û kulturî aver bena. Mohrkerdişê na komele goreyê prensîbanê huqûqî nîyo. Nê zilmo ke hetê şaredarîye ra ameyo kerdene, numûneyo tewr peyên o zexto sîstematîko ke vera ziwanê Kurdkî û heqanê kulturî yê şarê Kurdî de ameyo kerdene yo.
Kurdkî, Tirkîya de ziwanê dayîke yê nezîkê 25 milyon Kurdan o. Ma zanenê ke tarîx de, qedexeyanê ziwanî nê welatî rê tena îxtilafî û parçebîyayîş ardê. Sinorkerdişê heqanê ziwanî û kulturî aştîya komelkî rijnaya û ciwîyayîşê hemparî rê bîyê tehluke. Girewtişê Komela Cigêrayîşanê Ziwan û Kulturî ya Avestayî, vindarnayîşê fealîyetanê yew dezgehî ra zêde yo; no hêrişêko vera ziwanê dayîke, nasname û kulturê bi milyon kesan o. No qerarê neheqî yê Walîyîya Îzmîrî, bi astengkerdişê musayîş û averberdişê Kurdkî û ziwananê bînan, rijnayîşê nê zengînîye rê xizmet keno.
Heqê her welatijî est o ke her ca de ziwanê xo yê dayîke bimusîyo û hewce nîyo ke no heq bi qanunan yan zî pêameyîşanê mîyanneteweyîyan bêro pawitene. Îcraetê Walîyîya Îzmîrî nîşanêko eşkera yê keyfîyetê îdarî û pratîkanê teberê qanûnî yo. Senî ke Hemserekê Komela Cigêrayîşanê Ziwan û Kulturî ya Avestayî Ramazan Kaygisizî îfade kerdo, no mohrkerdiş ziwanê Kurdkî û estbîyayîşê kulturî yê şarê Kurdî ser o zextêko eşkera yo.
Ma veng danê Walîyîya Îzmîrî ke cade nê qerarê xo yê neheq û cîyakerî betal bikero û ray bido ke Komela Cigêrayîşanê Ziwan û Kulturî ya Avestayî fealîyetanê xo dewam bikero. Aştîya komelkî bi azadkerdişê heqanê ziwanî û kulturî mûmkîn a. Ma veng danê heme rêxistinanê civakî yê sîvîlan, pawitoxanê heqanê merdiman û rayaumûmîye ke vera nê pratîkanê ke aştîya ziwanî rê tehluke yê, paştîdayîşî xurtêr bikerê. Musayîş û averberdişê Kurdkî û ziwananê bînan semedê yewîye û zengînîya nê welatî zaf muhîm o. Qedexeyanê ziwanî rê nê, aştîya ziwanî rê eya!
Cemîle Turhalli – Heval Dilbihar
Hemverfekê Komîsyonê Ziwan, Kultur û Hunerî yê Partîya DEMî
2 Tebaxe 2025”
