Serekwekîla Grûba DEM Partî Gulîstan Kiliç Koçyîgît Meclîsî de kombîyayîşê çapemenîye de dîyar kerd ke dem ameyo ke qiseyî bibê kerdiş û vat, “seba caardişê serûberkerdişanê qanûnî yê şênber û girêdayoxan ganî yew deqa zî nêro vindîkerdene.”
Serekwekîla Grûba DEM Partî Gulîstan Kiliç Koçyîgît Meclîsî de kombîyayîşê çapemenîye de qisey kerd ke bale ante ser o ke ganî serûberdişê qanûnî lez bêrê viraştene û derheqê rojeve de erjnayîşî kerdî.
Koçyîgîte vat: “Krîzê herêmkî muhîmîya nê vengdayîşî fina eşkera kenê. Birêz Ocalanî mesajê xo de eşkera nîşan da ke vengdayîşê ci tena Tirkîya rê ney perspektîfê çareserkerdişî yê heme Rojhelatê Mîyanênî gêno mîyanê xo. Verba ma de ma vînenê ke Îran de se beno. Rîskê ke mudaxeleyê Îranî hîna girs bibo û şerê herêmkî hîna çetin bibo, est ê û ganî fina goş bêro dayene bi vengdayîşê Birêz Ocalanî.”
Koçyîgîte vat ke vengdayîşê Ocalanî heme Rojhelatê Mîyanênî rê modelêko demokratîk pêşkêş keno, tena modelî nêdano meydan berpirsîyarîya dewlete, sîyaset, Meclîsî û komelî zî dîyar keno.
Koçyîgîte vat ke entegrasyona demokratîke hewce kena ke Meclîsî aktîf bibo, partîyê sîyasî berpirsîyarîya hîna girde bigîrê xo ser û mîmarîyêka huqûqîye ke heme beşanê komelî gêna mîyanê xo, bêro viraştene. “Qanûnê haştîye, hewanayîşê astenganê vernîya azadîya îfade û rêxistinkerdişî bingeyê nê prosesî yê.”
Gulistan Kiliç Koçyîgîte vat: “Badê 27ê sibate nika vengdayîşo dîyin ameyo kerdene. Ganî 27ê sibate yo dîyin bibo 27ê sibate yê gamanê demokratîkan ê qanûnî û huqûqî. Ganî îqtîdar destê xo lez bikero. Hemverê rîskan de ke şer heme Rojhelatê Mîyanênî bihejno, ganî Tirkîya seba haştîya mîyanê welatî gamanê demokratîk û qanûnîyan bierza.”
