Partîya Cuya Azade ya Kurdîstanî (PJAK) derheqê hêrişan de ke merkezê partîyanê Rojhelatê Kurdîstanî yê Başûrê Kurdîstanî ser o bîyî, eşkerayî daye û vat ke nê hêrişî vera şarê kurdan û îtîfaqê partîyan ê û tersê rejîmê Îranî nîşan danê.
PJAK’î derheqê rojeva peyêne de eşkerayî daye û wina vat: “1ê adare 2026î de Muhafizanê Îranî bi fuze û teyarayanê bêpîlotan ê întiharî bingeyê partîyanê Rojhelatê Kurdîstanî yê Herêma Kurdîstanî de û bi taybetî bingeyê Komele û Partîya Demokratî yê Koye, Zirgewez û Surdaşî hedef girewtî. Ma sey PJAK’î nê hêrişan bi şîdet şermizar kenê.”
PJAK’î vat ke nê hêrişî kêmîya Îranî û Muhafizan û “nêzdîbîyayîşê dişmenane” yê vera şarê kurdan eşkera kenê: “Dewrêk de ke hêzê zordarî hemverê hêrişanê Îsraîl û Amerîka de yê, rejîm tu plan û sîyasetêko aqilane seba çareserkerdişê krîzan nêdano xo ver û şarê Îranî kerdî qurbanê waştişanê xo.”
PJAK’î wina dewam kerd: “Hêrişê vera partîyanê Rojhelatê Kurdîstanî delîlêko eşkera yo ke metodê rejîmê Komara Îslamîye ya Îranî 47 serrî yo teda û hêrişkarîye ser o ya. Rejîm nika vera rijîyayîşî de yo la hîna zî vera şarê kurdan û partîyanê kurdan metodanê leşkerîyan dewam keno.”
PJAK’î peynî de wina vat: “Hêrişê ke Muhafizî seba şiknayîşê yewbîyayîş û îtîfaqê hêzanê kurdan kenê, bêşik nîşanê tersê rejîmî yê. La nê cehdê rejîmî mehkumê vindîkerdişê girdî yê. Sebebê serkewtiş û piştîdayîşê ma, yewbîyayîş û pîyayîya ma ya.”
