Heyetê Îdareyanê Herêmîyan ê Demokratîkan ê DEM Partî netîcenameyê kombîyayîşê îdareyanê herêmîyan de waşt ke wa qeyûmî apey bêrê antene û hemserekîye bêra şinasnayene.
DEM Partî mabênê 25-26ê gulana 2025î de bi sloganî “Îdareyanê Herêmîyan ê Demokratîkan Reyde ver bi Komelê Demokratîkî” kombîyayîşêk kerdbi. Netîcenameyê kombîyayîşî ame eşkerakerdene.
Netîcename de ame vîrvistene ke weçînayîşanê 31ê adare ra dima 10 şaredarîyan rê qeyûmî ameyê tayînkerdene û no zî tengbîyayîşê îqtîdarî eşkera keno. Netîcename de wina ame vatene: “Şert û mercî se benê wa bibê ma do îradeyê şarî bipawê û şaredarîyanê xo apey bigêrê. Ma do her hêrişê vera sîstemê Hemserekîye vindarnê. Sey DEM Partî ma do goreyê mîrasê şaredarîya komelpereste xebatanê xo bidomnê û şaredarîyan bi şefafî, bi beşdarîya şarî îdare bikerê.
Seba qedênayîşê dej û wêranîye 27ê sibate de Birêz Abdullah Ocalanî mesuldarîyêka tarîxî girewte xo ser û veng da. Verê ney de ganî prosesê demokratîkbîyayîşê Tirkîya bi lez biqedo. Aktorê serekî yê ke nê prosesî de netîceyan virazê îqtîdar û dewlete yê.
Ma awankerdişê îdareyanê herêmîyan ê demokratîkan seba Tirkîyayêka demokratîke muhîm vînenê. Na çarçewa de:
⦁ Ganî qeyûmî ke ameyê tayînkerdene, apey bêrê antene û weçînitoxî agêrê wezîfeyanê xo ser o.
⦁ Ganî madeyê eleqedarî yê Qanûnê Şaredarîyan ê 5393yî bêrê wedaritene û tayînkerdişê qeyûman biqedo.
⦁ Ganî pênaseyê Hemserekîye yê Qanûnê Partîyanê Sîyasîyan qanûnê şaredarîyan de zî bêro dîyarkerdene.
⦁ Ganî wesayeto îdarî û ekonomîk ê îdareyê merkezî yê vera îdareyanê herêmîyan wedarîyo.
⦁ Ganî demokrasîya temsîlkarîye ra zafêr şar raşteraşt tewrê prosesanê demokrasîyî bibo.
⦁ Ganî şertê Tirkîya yê serê Şertê Xoserîye yê Peymana Îdareyê Herêmî ya Ewropa bêro wedaritene.
Ma reyna perwerîya xo seba paradîgmaya cuya hempare ya Birêz Ocalanî îfade kenê. Ma soz danî ke do mesuldarîyanê xo bîyarê ca.”
