Komîsyonê Kede yê DEM Partî dîyar kerd ke 1ê Gulane de waran ra do waştişê kedkaran biqîrê. Partî bi mojnayîşê krîzê ekonomîkî, sîyasetê şerî û feqîrîye waşt ke Meydanê Taksîmî seba pîrozkerdişan abîyo.
Komîsyonê Kede yê DEM Partî seba pîrozkerdişanê 1ê Gulane Roja Kedkaran a Dinya de eşkerayîya çapemenîye viraşte.
‘Şer cuya şaran parçe keno’
Hetkarê Hemserekîya Pêroyî ya berpirsîyara Komîsyonî Sevtap Akdag Karahanli vat ke şerê Rojhelatê Mîyanênî tena sînoran ney cuya şaran zî parçe kenê û mudaxeleyê emperîyalîstî bi sîyasetê îqtîdarê herêmkî feqîrîye xorîn kena, koçberîye girs kena û keda şarî hîna zêde bêgarantî kena.
Sevtap Akdag Karahanli vat: “Cayo ke tede şer est o, şuxulnayîşê kede zêde beno, heqî gîrîyenê, ameyoxê şaran tarî beno. Coka 1ê Gulane de pawitişê haştîye, pawitişê ked o.”
Sînorê vêşanîye
Sevtap Akdag Karahanli vat ke heqê karkerîye yo tewr kêmî tarîxê welatî de reya verêne kewt binê sînorê vêşanîye: “Sînorê vêşanîye resayo 30 hezar TLî la vera ci de heqê karkerîye yo tewr kêmî 28 hezar û 75 TL yo û mîlyonan erzeno ver bi feqîrîye. Bi mîlyonan teqawûdî bi 20 hezar lîrayî têkoşînê cuye kenê. Her çar ciwanan ra yewê ci bêkar o. Her hîrê gedeyan ra yewê ci feqîr o.”
Xebatê 1ê Gulane 12ê nîsane de do dest pêbikerê
Hemverfekê Komîsyonê Kede Mehmet Bozgeyîkî vat ke 12ê nîsane de do bikewê warî û bi beşabê cîya-cîyayan ê komelkîyan de têkoşînê hemparî girs bikerê. Hem waştişê kedkaran ê ekonomîk û komelkî hem zî derheqê Prosesê Haştî û Komelê Demokratîkî de waran ra waştişê xo bîyarê ziwan.
‘Wa qedexeyê Taksîmî bêro hewanayene’
Bozgeyîkî vat: “Ma wazenê ke qedexeyê Taksîmî bêro hewanayene, na rewşa bêhuqûqîye biqedîyo û Taksîm bi heme meydanan seba kedkaran, karkeran û heme beşanê muxalîfan ê komelkî yê Tirkîya abîyo. Ma nê vengdayîşê xo îqtîdarî rê reyna tekrar kenê.”
