Derheqê muxabîra JINNEWS’î Oznur Deger de, seba ke hemverê vateyanê cînsîyetperest ê polîsan reaksîyon nîşan da, tehqîqat ame destpêkerdene.
Oznur Degera ke seba tazîyeya rojnamegerî ke Rojawayê Kurdîstanî de hetê SÎHAyanê dewleta tirke ameyê kiştiş Cîhan Bîlgîn û Nazim Daştanî şîbî Mardîn, maruzê vateyanê polîsan ê cînsîyetperest bîye û reaksîyon nîşan da, derheqê aye de tehqîqat ame destpêkerdene.
Walîtîya Mardînî, seba ke Oznur Degere hemverê heqeretan reaksîyon nîşan da, bi îddîaya “Heqeretê xebatkarê umûmîye” tehqîqat da dest pêkerdiş. Ame musnayene ke Oznur Degere hesabanê xo yê medyaya sanale ser o hetê kesanê ke nasnameyê înan eşkera nîyo yena tehdîtkerdene û yena hedefgirewtene.
MGK’yî ra hemverê tehqîqatî de reaksîyon
Komela Rojnamegeranê Cinîyan a Mezopotamyayî (MKG) derheqê babete de beyanatêk da û wina vat: “Sîstemêko vateyanê cînsîyetperestan paweno la rojnamegeran bi ceza keno, ma qebul nêkenê. Ma embaza xo het de yê.”
