Dêrsim de, seba 4 Gulanê jû panel ame viraştene. Panel de, Saîr Nesîmî Aday, Tarîxnas Yalçin Çakçak, Akademîsyen Gûlnaz Karatay û Federasyone Elewîyu ra Huseyîn Matî qisey kerd.
‘Roştîye ma rê nêasena’
Saîr Nesîmî Aday, qiseykerdişê xo wina va: “Tengîye welate ma de her waxt est a. Verênde ke henî bî, nika ke hênî yo. Seba 4 Gulanê, Roja Şaye ser ameyme peser. 100 serrî yo ke, ma ser de roştîye nêasena.”
‘Sefer beno Zafer nêbeno’
Tarîxnas Yalçin Çakmakî vat: “Tarixê Dêrsimî de, dewleta Osmanîyan û Cumrîyete xeylî seferî ardê serê aşîranê Dêrsim ser. Xeylî seferî kerdê la zafer qet nêbîyo. Îtîqat û bawerîya Dêrsimî, je îtîqate dewlet nêbî. Dewlete îtîqatê Dêrsimî ra rehetsize bîye. Osmanîyan ra kewtêrî Cûmhûrîyete vaşt ke Dêrsimî bîjêro binê destê xo. Şex Saîd û Sey Rizayî darde kerdî. Koçgirî de oncîya zaf tenî ameyî kîştene. Sîyasetê dewlete Dêrsimî tirk kerdene ser şuxulîno. Seba naye mekteban virazeno, camîyan virazeno ke cayê xo hîra bikero.”
‘Sarê Dêrsim xeylî travmayî dîyê’
Akademîsyen Gûlnaz Karataye zî qirkerdişî û travmayan ser vinerte û wina vat: Sarê Dêrsimî, handê qirim dîyo, han dê heşîrîye dîya, tepîya travma ameya travma ser. Welatê xo de weşîye ramitene cîrê giran ama. Her ca, her bosta nê herdan de rêcê qirkerdîşî est ê. Verêndeke çî bîyo, amo jûminî ser. Naskerdayene xo, îtîqatê xo, raye ramitena xo bîya dirbetin. Dima ra, tayê înan bar kenê sonê, tayê koka xo ser de vindenê, tayê zî zerê hêşîrîye de manenê. Na travma key ke, jûminî naskerdene bîye, key ke ameyî werê hona bena wes.”
‘Qirim hona nêqedîyo’
Serekê Konfedarasyonê Yewî yê Elewî yê Ewropa (AABK) Huseyîn Mat zî wîna vat: “Nêvazenê ke, ma zon û îtîqat ser weşîye xo biramnîme. Domanê ma, zonê xo de Mekteb nêwanenê. Sarê Kirmanc û Sarê Kurmanc, jê jûminî bindestîye vînenê. Qirkerdîşê ma, Maraş û Sevas de bî, qirkerdîşe ma hona kî nê xeleşîyo. Na qeyde ra 4 Gulane, tarixa ma de rozê de zaf mûhîm a.”
