Serekê Pêroyî yê MHP’yî Devlet Bahçelîyî reyna şexsê HSD’yî de Rojava tehdît kerd û waşt le eşîrê erebî HSD’yî ra biaqitîyê û şêrê Şamî reyde pêbikerê.
Serekê Pêroyî yê MHP’yî Devlet Bahçelîyî kombîyayîşê partîya xo yê Meclîsî de qisey kerd. Rojevê Bahçelî de reyna tehdîtê vera Rojavayê Kurdîstanî est bi û Hêzê Sûrîya Demokratîke (HSD) tehdît kerd. Devlet Bahçelî ke HSD’yî kerdo hedefê xo, na reye eşîrê tehdît kerdê û waşt eşîrê erebî HSD’yî ra biaqitîyê û şêrê hukmatê demkî yê Şamî reyde pêbikerê.
HSD’yî çimanê eşîran de tarî keno
Devlet Bahçelî derheqê hedîseyanê Sûrîye de reyna şexsê Hêzanê Sûrîya Demokratîke (HSD) de Rovaja tehdît kerd û wina vat: “Ganî Sûrîye de entegrasyon bilez bêro kerdene û goreyê vengdayîşê 27ê sibate yê Îmralîyî hedîseyî xo bimojnê. HSD û YPG’yî bi waştişanê ke muzakere nêro kerdene, benê sebebê endîşeyan ke enetegrasyon nêro kerdene, baxaneyan vejenê. HSD û YPG’yî herêmêka hîra ya Sûrîye girewta xo dest. Uca hetê çimeyanê binêerd û serêerdî ra herêmêko zengîn o. HSD û YPG binê tesîrê Îsraîlî de yê û hetê sîyonîstî namerdî ra Mazlum Ebdî herinda Serekê awanker ê PKK’yî amade keno. No do neçareserî û kaosî xorînêr bikero. Yan bi peymane yan zî bi zorî sîstemê Unîter ê Sûrîye ganî bêro pawitene. Nê esasî ser o ganî eşîrê ereb hetê rayberîya Şamî de bêşert û merc ca bigîrê. Sûrîye de planê Îsraîl do binkewê.”
