Di cîldî kitabê “Çepera Rûmetî: Kobanê” ê fermandaranê şerê Kobanê ra yewe Meryem Kobanê Weşanxaneyê Aramî ra vejîya.
Şer û xoverdayîşê Kobanê yê serra 2014 û 2015î her tim zar û ziwanan ser o yo û her gama ey beno destan, hîkaye, sînema, tîyatro û deyîr. Xeylê fîlm û kitaban ra pey na rey zî kitabo ke behsê destana Kobanê keno, kitabê “Çepera Rûmetê: Kobanê” ê fermandaranê şerê Kobanê ra Meryem Kobanê Weşanxaneyê Aramî ra vejîya. Kitabî de behsê şer û xoverdayîşê Kobanê yeno kerdene. Ame zanayene ke cîldo hîrêyin zî dore de yo û do bêro çapkerdene.
Kitab belgeyê xoverdayîşî yo
Kitab behsê her gama şerî keno û şahîdîya tarîx û xoverdayîşî keno. Her rîpelê kitabî belgeyê şer û xoverdayîşî yo. Kitabî de yeno vatene ke ka şerwanê kurdan vera şerê hovane yê DAÎŞ’î senî xover dayo û ruh û laşê xo kerdo çeper.
‘Qelema cinîyêka têkoşere ra’
Şahîdanê xoverdayîşê Kobanî ra yew zî rojnameger Abdurrahman Gok o. Gokî bi aşman çeperê xoverdayîşê Kobanê taqîb kerd û ey zî game bi game şahîdîya zehmetîya şerî kerde. Edîtorê kitabî rojnameger Abdurrahman Gokî hesabê xo yê X’î ser o vejîyayîşê kitabî pare kerd û wina vat: “Destana ‘Çepera Rûmetî: Kobanê’ Weşanxaneyê Aramî ra vejîya. Kitab behsê têkoşînê derûdorê rûmet û îradeyî keno. Kitab qeleme û şahîdîya cinîyêka têkoşere ya her vînceyê herra welatî de herindêka tarîxî verdaya, qelema aye ra vareno. Di cildî çap bîyê, cîldo hirêyin zî dore de yo…Ez biba biwanê…”
