Belgefîlmê “Li Kurdistanê Şev û Mij” o ke Şîlan Sadî dîrektorîya ci kerda, Festîvala Fîlman a Female Eye ya Toronto de xelata belgefîlmî ya tewr başe girewte.
Dîrektor Şîlan Sadî ya ke rojhelatê Kurdîstanî ra ya, bi belgefîlmê xo yê bi nameyê “Kurdîstan de Şev û Mij” Kanada de xelata belgefîlmî ya tewr baş ya metrajderg girewte. Belgefîlm Festîvala Fîlman a Female Eye (FeFF) de ke Toronto de mabênê tarîxanê 14 û 19ê teşrîna verêne de ameye kerdene, layiqê xelata Best Feature Documentary ame vînayene. Fîlmê “Li Kurdistanê Şev û Mij” derheqê Kurdanê Êzidî û qirkerdişê Şengal de yo.
Na festîvala ke serra 2001î de ameya ronayene, sey festîvalanê fîlmanê cinîyan ê tewr erjîyaye yê dinya ra yew yena vînayene û lîsteya festîvalanê Pêşnîyazê Xelatanê Sînemayî yê Kanada (Qualifying Canadian Screen Award) de ca gêna.
Şîlan Sadî zafane belgefîlman ser o û sey çêker xebatan kena. Bi taybetî zehmetîyanê cinîyan kurd ê ke astengîyanê sîyasî û komelî reyde rî bi rî manenê, seba înan xebitîyena. Eynê wextî de aye vana ke, a sînema sey materyalê xoverdayîş û xoîfadekerdişo kulturî vînena.
Fîlmê Şîlan Sadî yê ke qada mîyanneteweyî de ameyê mojnayene û xelatî girewtê wina yê: “Fîlmografî, Li Kurdistanê Şev û Mij (2024), 5 Dayik û Keseke Ji Rêzê (2020), 001 (2017), Keça Dapîra Min (2014), Kuçeya Li Pişt Mala Me (2010), Cil û Bergên Mukriyanî (2008), Xewna Wenda (2006)”
