Heyetê DÎSK’î Meydanê Taksîmî yo ke binê ablukayê polîsan de yo, çelengê 1ê Gulane rona.
Heyetê Konfederasyonê Sendîkayan ê Karkeranê Şorişgeran (DÎSK) Meydanê Taksîmî yo ke binê ablukayê polîsan de yo, çelengê 1ê Gulane rona. Ronayîşê çelengî ra ver Heyetê DÎSK’î bi pêşengîya Sereka DÎSK’î ya Pêroyî Arzu Çerkezogluye, verê Konsolosîya Almanî de ame têhet. Heyetê DÎSK’î bi çepik û siloganan ver bi Meydanê Taksîmî rayîrî ra şi. Heyetê DÎSK’î bêmaben siloganê “Biciwîyo 1ê Gulane”, “Do qeyûmî şêrî, ma bimanî” vatî û dima zî vernîya abîdeyî de çelenk rona.
Demê ronayîşê çelengî de Sereka DÎSK’î ya Pêroyî Arzu Çerkezogluye qisey kerd û va ke ewro 1ê Gulane ya, ê seba ronayîşê çelengî ameyî tîya û wina va: “Heme Dinya de karkerî cayêko dîyar kerdo, uca de çelenk ronenê. Çi heyf ke bi serran o ke welatê ma de Meydanê Taksîmî ameyo qedexekerdene. Ma do Meydanê Taksîmî azad bikê.”
