Domanê Mexmûrî yê ke perwerde yew parçeyê esasî yê cuyê înan o, binê sîwanê Merkezê Stêra Zêrîn de xo fêrî muzîkî kenî û kulturê xo aver benî. Mamostayan û wendekaran bala xo antê perwerdeyî ser û vengê ciwananê kurdan danî ke kulturê xo aver biberî, xo bonder bikerî.
Bi destpêkerdişê betlaneya hammanî ya wendegehê Wargehê Penaberan ê Şehîd Rûstem Cûdî (Mexmûr) reyde Merkeza Stêra Zêrîn de perwerdeyê hacetanê muzîkî dest pê kenî. Her serr bi seyan doman û ciwanê wargehî seba fêrê lêxistişê hacetanê muzîkî bibî, xo danî Merkezê Stêra Zêrîn. Nê serr zî 150 doman û ciwanê wargehî Merkeza Stêra Zêrîn de serê bingeyê pawitiş û qîymetdayîşê kulturê şarê kurdî de hetê hacetanê muzîkî de yenî perwerdekerdiş.
Veng û rengê doman û ciwananê wargehî mîyanê Merkezê Stêra Zêrîn de keyfweşîyêka pîle dano dorme. Domanê ke bi destanê qijkan tembûr, gîtar û erbaneyan lê yenî, hêzê cuyê merdiman zêde kenî. Ci ra dûrî zî heskerdişê înan ê bi hunerî reyde serê rûyanê înan de nîşan dano. No sebeb ra ma xo da Merkezê Stêra Zêrîn û ma waşt ke ma nê wextanê weşanê nê doman û ciwanan şima reyde pare bikerî.
Bi nê babetî reyde, wendekar û mamostayê Merkezê Stêra Zêrîn qisey kerdê.
“Derfetê ke destê ma de yê zaf sinordar ê”
Mamosta Çîdem Uren ke nê 2 serrî yo Merkezê Stêra Zêrîn de perwerdeyê gîtarî dana wendekaran, destpêkê qiseykerdişê xo de destnîşan kerd ke nê 11 serrî yo kar û xebatanê kultur û hunerî kena û va: “Nê 4 serrî yo bi taybetî betlaneya hammanî de Merkezê Stêra Zêrîn de perwerdeyê hacetanê muzîkî, govend û dewan yenî dayene. Nê serre hûmarêka zêde ya wendekaran beşdarê nê perwerdeyan beno. Ma nika hîrê mamostayî uca de perwerdeyê tembûr, gîtar û erbane danî 150 wendekaran. Her çiqas ke derfetê destê ma de zaf sinorîn ê zî labelê ma reyna hewldanî perwerdeyêko serkewte bidî wendekaranê xo. Doman û ciwanê wargehî zî bi kelecanêko pîl xo danî no Merkez. Armancê ma o yo ke ma doman û ciwananê xo hetê kultur û hunerê şarê kurdî de perwerde bikerî.”
“Ma pawitişê kultur û hunerê şarê xo kene”
Çîdem Uren peynîya qiseykerdişê xo de eşkera kerd ke perwerdeyo ke Stêra Zêrîn de yeno dayene, sey yew bingeyî yeno destgirewtiş û wina qiseykerdişê xo bi peynî kerd: “Dima ke wendekarî uca ra mezûn benî, derbasê Akademîya Şehîd Serhedî benî ke binê sîwanê Kultur û Hunerê Mexmûrî de ya. Çîyo ke ma rê muhîm o, pawitişê kultur û hunerê şarê kurdî yo. Seba ke ma kulturê xo aver bikerî û pîl bikerî, pêwîst o ke ma bonderê kultur û hunerê xo bibî. Ma vengê ciwananê şarê kurdî kenî ke kultur û hunerê xo ra pey nêmanî, xo bonder bikerî û bidî bonderkerdiş.”
“Çeka ma hacetê ma yê muzîkî yê”
Mamosta Qeder Apaydin ke perwerdeyê pirodayîşê erbane dana wendekaran, destpêkê qiseykerdişê xo de bala xo ant ser girîngîya perwerdeyî ya seba doman û ciwanan û wina ard ziwan: “Nê serr ez perwerdeyê erbane dana domanê ke yenî Merkez. Hûmara wendekaranê nê serrî goreyê serra verêne zaf baştir o. No yew zî seba ma cayo keyfweşî yo. Seba ke wendekarî zaf ê, ez bi hawayê di komî perwerde dana. Wendekarê ke di serranê xo uca de qedînenî, derbasê Akademîya Şehîd Serhedî benî. Ma mîyanê bêderfetan de pîl bîyî. Labelê ewro ma bi seyan doman û ciwananê xo fêrî hacetanê muzîkî kenî. Ez vengê şarê Kurdî kena ke domananê xo hetê kulturê xo de perwerde bikerî.”
“Ez wazena bonderê heme hacetanê muzîkî bonder biba”
Tewr peynî zî wendekarê qij Rihan Ozer zî dîyar kerd ke nê di serrî yo Merkeza Stêra Zêrîn de perwerdeyê erbane vîneno û wina qedîna: “Ez wazena ke komelê ma hetê bikaranayîşê hacetanê muzîkî de zaf aver şiro. Ez wazena ke bonderê pirodayîşê erbane û heme hacetanê muzîkî bibina. Labelê zaf hacetê muzîkî mi rê pîl ê, no sebeb ra mi va ez do destpêk de bonder erbane bibina. Wexto ke ez pîl bîya ez do xo bonderê tembûr û gîtarî zî bikera. Ez zaf şansena ke ez kurd a. Ez vengê domananê kurdan kena ke bila ziwanê dayîka xo bonder bibî.”
