Xozaya Şirnexî her roje hetê şîrketanê bazirganî û madenî ra yena talankerdene. Rayedarê dewlete nika zî bi viraştişê HES’an wazenê wazenê xozaya Elkê talan bikerê.
Dewlete bi serran o Şirnex û qezayanê ey talan keno. Qezaya Qileban ê Şirnexî de xeylê Santralê Hîdro Elektrîkî (HES) ameyê viraştene. Reyna seba ke çemê Hêzilî de HES’î bêrê viraştene, qerar ame girewtene. Qezaya Elkê de zî ney ra ver awa dewa Germavî de HES’êk amebi viraştene. Nika zî seba 4 HES’anê bînî qeza de bêrê viraştene, amadekarî yenê kerdene. 18ê temmuze de qerarnameyê Serekkomarî de ame dîyarkerdene ke awa dewa Germavî ser o HES’êko bîn bêro viraştene.
Her çend Rojnameyê Fermî yê Dewlete tena seba derûdorê dewa Germavî qerarê îstîmlaqkerdişî amebi dayene zî, goreyê agahîyanê ke ameyê girewtene, do dewanê Karçanê, Bêzal û mabênê dewanê Gelejêr û Setkarî de zî HES’ê bînê bêrê viraştene. Projeyê viraştişê nê HES’an nika ra ver pîlanê dewanê Karçanê, Bêzal, Gelejêr û Setkarî rê ameyo vatene. Dewijê ke ma bi rayîrê telefonî xo resna înan, dîyar ekrd ke ê seba pawitişê xoza û awa xo nêwazenê no proje dewanê înan de bêro viraştene.
