Piyê Rojîn Kabaîş a ke bi hawayê de gumanbar ganê xo kerd vîndî, Nîzamettîn Kabaîşî ard ziwan ke rayedaran çi ameyo sereyê keyna ey zanenê labelê wazenê dosya binimnê. Nîzamettîn Kabaîşî veng da ke wa yew komîsyonê xoser bêro awankerdenê û nîşan da ke seba edalet bêro ca, avûkatî wa rasterast serê erebeya sipî û girewtişê îfadeyanê embazanê aye yê ke eynî ode de mendêne, vinderê.
Rojîn Kabaîşa ke wendekara Zanîngeha Wanî ya Yuzuncu Yilî bîya, 27ê îlonê 2024î de dima ke seba herinayîşê qehwe wargehê zanîngehî ra vejîya, bi hawayê ke gumanbar vîndî bîya. Peyê cigêrayîşanê hîrayan de cenazeya aye verê gola Wanî de ameye vînayene û raporê Saziya Tipê Edlî (ATK) de ame tespîtkerdenê ke sebebê mergê aye “awe de xeniqîyayîş” o. La baro û avûkatê keyeyî nîşan danê ke raporê ATKî de nîno zelalkerdenê ke aya na hedîse întîhar a, qeza ya yan zî kiştiş o. No semed ra gumanê serê mergê Rojîn Kabaîşe dewam kenê. Raporê otopsî yo fermî de ameyo qebulkerdenê ke serê her di çokan, her di milan û verê sîneyê Rojîn de bedilîyayîşê rengan ê ke şibîyenê gonîrijîyayîşî ameyê vînayene. Baroyî da zanayenê ke sazgehê fermî sere ra hedîse sey “xokiştiş” nîşan daya û gumananê kiştoxan ser de cigêrayîşê ke aktîf nêramito. Serê îtîrazê avûkatanê baroyî, Mehkemaya Îdareyî ya Herêma Erzurumî qerarê Walîtiya Wanî ya ke destûr nêdayêne ke rayberîya wargehî bêro perskerdenê, betal kerde û bi nê hawayî seba îhmalîya rayberîye, raya cigêrayîşî bi fermî ame akerdenê. Keyeyê û avûkatê heqanê cinîyan wazenê ke dozgerî serê heme guman û kêmanîyan dosya de cigêrayîşê ke xorîn bikero ke na dewa sey dewanê bînan tarîtî de nêmano û wa edalet bêro ca.
Piyê Rojîn Kabaîşe, Nîzamettîn Kabaîş seba bîyayîşê edaletî û roşnkerdişê dewaya keynaya xo mucadeleyê ke bêemsal dano. Nîzamettîn Kabaîşî derheqê nakokîyanê dosya û averşîyayîşê dewaya keyna xo Rojîn Kabaîşe de ajansê ma rê qisey kerd.
‘Wesayîto sipî kotî de yo?’
Nîzamettîn Kabaîşî vera tekrarkerdişê eşkerayîya avûkatan reaksîyon mojna û diyar kerd ke mehkema serê dewaya Rojîn Kabaîşe de weş nêxebitîyena. Nîzamettîn Kabaîşî vat ke cayê tekrarkerdişê agahîyanê sey cigêrayîşê serê 425 kesan, yan zî şîyayîşê telefonî yê Îspanya, ganî avûkatî serê çîyanê raştan û delîlan de vinderê ke dewa ser bikewa û vat: “Vanê ke serê 425 hebî doneyan de cigêrayîş kenê, avûkatê sazgehanê heqanê cinîyan eşkerayî danê û vanê 312 heban ser o cigêrayîş kenê. Gelo hayîya şima dosya ra esta? Çira şima tersenê? Şorê dozgerî ra pers kerê. O taksîyo sipî ke a cinîya verê baxçeyê unîversîte de tira behs kena, a eşkere vana. Vana ke wesayîtê de sipî amebî, di hebî merdimî tede bîyê, camê vernî ronaye, peyên zî fîlmê înan sîya bîyî. Nê nuqteyî zaf muhîm ê.
Avûkat ganî vajo no wesayît kotî de yo, ganî bêro vînayene û bêro kontrolkerdenê. Gelo şopê bêçikan serê kursîyê aye de esta yan ney? Ganî serê qeydanê nê di cîwananê zereyê wesayîtî de yê û sînyalê telefonanê înan de cigêrayîş bêro kerdene.”
‘Serê rî de şopê pirodayenê estê’
Nîzamettîn Kabaîşî dewamê qiseykerdişê xo de diyar kerd ke ey bi xo waştişname dayo edlîye û va ke o wextê ke şoro Anqara zî nê waştişnameyî nîşanê Wezaretê Edaletî bido. Nîzamettîn Kabaîşî va ke raporo ke vano Rojîn awe de xeniqîyaya raporêko sexte yo, û waştişê cigêrayîşê rektor, merdimanê rektorî, heme asayîşê unîversîte û her di dewan kerd û nê çîyî vatî: “Çike serê çimê aye de şopê pirodayenê estê, la serê bedena aye de çîyê nîno vînayene. Belkî zereyê awe de verdayê. Merdim wina texmîn keno, çike ti vanî çira pişika aye de awe çin a? Ya dîyine zî, kincê keyna mi huşk bibî, kazaxê aye pê zeliqîyabî. Bedena aye zî nêwerimîyabî. Wextê ke 18 rojî zereyê awe de bimano, nêşêno ke nêwerimo. Kincê aye ganî bidirîyanê û maseyan aye biwerdêne. Yanî 18 rojî uca de nemenda. Kamcîn awa ke dewa ra yena û şina serê gole? Belkî keyneke awe de xeniqnaya? Pişika aye de awe esta yan nê, û kamca awe şîya pişika aye, ganî merdim serê nê nuqtayan de vindero.”
‘Embaza aye ya odeyî, raşt nêvana’
Nîzamettîn Kabaîşî rayberîya unîversîte û asayîş bi îhmalî sûcdar kerd û tespît kerd ke o cayê ke telefona keyna ey ameye vînayene seba pawitişê delîlan şerît nêameyo girewtenê. Nîzamettîn Kabaîşî bale ante serê embazanê odeyî yê Rojîn Kabaîşe û diyar kerd ke kamerayê ke ey rê vatê xerapîyayê bîyê, ey bi xo resm û dîmenê înan girewtê û va ke ey bi xo waştişname dayo dozgerîye. Nîzamettîn Kabaîşî serê rewşa embazanê odeyî û saetanê vîndîbîyayîşî yê Rojîn Kabaîşe wina vat: “Embazê aye ya unîversîte, embazê aye ya odeyî, ma rê îhanet kenê. Ê uca de bîyî. Çike saete şeş û nêmê şanî de maya xo rê vana ez şina market ke Nescafe bîgirî. Dima ra, agahî aye ra birîyêna û ver bi hetê gole şina. Na keyneke bi saxî şîya, yewî vengdayena aye kerda. Îfadeyê rast nêdîyayê. Îfadeyê serra 2025î û yê serra 2024î têmîyankerdê. Na keyneke çîyê zanena. Rayberîya unîversîte aye tehdîd kerda û tersnaya. Tehdîd û ters hem serê a keyneke de esto, hem zî serê a cinîya dewije de est o. A keyneke, yanî raşt nêvana. Bêçika aye zî zereyê nê karî de esta.”
‘Dewa bi berzkerdişê vengî aver şina’
Nîzamettîn Kabaîşî peynîya qiseykerdişê xo de bal ant serê hewldananê girewtena dosya û ard ziwan ke ê na rewşe qebul nêkenê. Nîzamettîn Kabaîşî tewr peynî de eşkera kerd ke o do qet dest na dewa ra veranêdo û wina vat: “Heta ke ma vengê xo berz nêkerê, dewa aver nêşina. Na hedîseya kiştişî ya, la sey dewaya Gulîstan Doku ya ke 6 serrî yo vîndî ya, wazenê na dewa zî binimnê. Çiqas eşkerayî zî danê, eynî çîyî reyna kenê: ‘Telefon şîyo Îspanya, şîyo Çîn’ agahîyê winasî seba xapnayenê domanan ê! Çike wazenê serê dewa bigîrê, nê çîyan vanê. 11 hebî wesayîtê sipî kewtê û vejîyayê, karê her 11na zî eşkere bikerê. Serê kamerayan de vinderê, serê taksîya sipî de vinderê, serê embaza aye ya odeyî de vinderê. Nê çîyî muhîm ê. Ez veng dana sazgehanê heqanê cinîyan û wijdanê her kesî; serê na dosya de vinderê. A keyneka uca ra berde kotî? Kamî a vîndî kerde? Ganî nê çîyî bêrê eşkerekerdenê.”
