Herêma Gova Reşo ya qezaya Elkê de yew aşme verî hetê TPAO’yî ra bîrê petrolî ameyî akerdiş û dest bi cigêrayîşê petrolî ameyo kerdiş. Bi abîyayîşê bîranê petrolî habîtat û floraya zozanan bi destê şîrketan yeno xerakerdiş.
Şirnex de bi birnayîşê daran, cigêrayîşê petrolî, ocaxê madenan ê komir, kerraye, xîz û bendawan xozaya yena talankerdene. Bi talankerdişê xozayî awê robar û newalan û çimeyan kêm bena û no talankerdiş tesîrê serê hewayê herême zî keno. Koyê Gabarî yê Şirnexî de serra 2022î ra nat cigêrayîşê petrolî dewam keno û seba cigêrayîşê petrolî her cayê koyî ameyo kenayîşî û darî ameyî birnayene. Hîna ke xozaya Şirnexî seba cigêrayîşê petrolê Koyê Gabarî talan û tune bîya zî no rey quntarê Koyê Kato yê qezaya Elkê ya Şirnexî de cigêrayîşê petrolî dest pê kerd.
Şîrketa Hembarîya Petrolanê Tirkîya (TPAO) herêma Gova Reşo ya bi ser nîşankerdîşê Elkê ra 25ê Gulane de bîrê petrolî akerd û dest bi cigêrayîşê petrolî kerd. Hîna ke serranê verî ra nat zî heman herême de 8 mîlyon TL ameybî xerckerdiş û bîrê petrolî ameybî akerdiş û seba ke nêameyêne dîyene dest vera ey ameybî verdayene zî yew aşme verî rayîrêko bîn cigêrayîşê petrolî dest pê kerd. Welatijê ke hardê înan Gova Reşo de est o seba ke bîrê petrolî bêrî akerdiş mecbur mendî ke hardanê xo bîfiroşî. Benda yo ke seba bîranê petrolî yê ke nika yenî akerdiş budçeyêka zaf zêde bêra raznayene.
Zozanê welatijan pêşkêşê şîrketan kerdî
Gova Reşo quntarê Koyê Kato de ca gêno. Welatijê Elkê ke bi sewalkarî û citkarîye debara xo kenî, her serre aşmanê germî de xo danî Gova Reşo. Her wina seba ke Gova Reşo de aw zaf a, welatijî uca de citkarîye reyde zî eleqedar bîyêne û uca de zaf welatijan est o. La dima ke bîrê petrolî uca de ameyî akerdiş, welatî zî nêeşkenî şirê mîyanê erdanê xo û pezê xo bibî bixecînê. Gova Reşo ke bi hîncetanê “Ewleyî” welatijan rê ameyo qedexekerdiş, pêşkêşê şîrketan ameyo kerdiş. Bîrê petrolî benî sebebê xerakerdişê xozaya zozanan.
Makîneyê xebate yê cigêrayîşê petrolî herîndêka fireye de vila bîyî û petrolî cigêrenî û seba dîyayîşê petrolî bîran akenî. Her wina dorme zî ameyo kenayîşî û erdê welatijan binê herre de mendo. Gova Reşo ya verê ke mîyanê şînayî de vînî bîyêne nika bîya sehaya sondajê petrolî. Her roj bi desan kamyonê pîlî zî rayîr ser o şinê û yenê, no yew zî beno sebebê hewanayîşê toz û dûmanî. No toz û dûman tesîrê serê bax, bostan û xozayî û cuyayîşê welatijan keno. Bîrê petrolî benî sebebê erozyonê erdî û ziwakerdişê çem û çimeyan. No yew zî tesîrêko pîl serê cuyîşê welatîyanê qezayanê Elkê keno. Her wina no yew ekosîstemê herême zî xera keno.
