Amed de seba endamanê YJA-STAR’î Hanim Demîr (Berfîn Nûrhaq) û Încî Sumbul (Sema Roza) ke serra 2021î de Garê de cuya xo vîndî kerdbî, merasîmê yadkerdişê ame kerdene.
Endamê YJA-STAR’î Hanim Demîr (Berfîn Nûrhaq) û Încî Sumbul (Sema Roza) 13ê kanûna 2021î de Garê de cuya xo vîndî kerdbî, Amed de bi pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) a Amedî bi programêk awanîya DEM Partî de ameyê yadkerdene. Merasîmî de fotografê endamanê YJA-STAR’î ameyê ronayene û mumî ameyê veşnayene. Merasîm seba cangorîyanê azadîye bi deqîqeyêk rêzgirewtişî reyde dest pêkerd û dima ra zî sirûdê Çerxa Şorişî ame vatene. Sirûdî ra pey sînevîzyono ke behsê cuye û têkoşînê her di endaman keno, ame temaşekerdene. Temaşekerdişê sînevîzyonî ra pey Hemsereka MEBYA-DER’î Gurbet Sevîtek û aktîvîsta TJA’yî Emîne Caynak qisey kerd.
Hemsereka MEBYA-DER’î Gurbet Sevîtek qiseykerdişê xo de behsê têkoşînê cinîyan kerd û vat: “Cinîyî kamca de bibê wa bibê rêça Şehîdan ser o têkoşînê xo domnenê. Ma sey cinî têkoşîno ke embazanê ma yê cinî rayra berdo, ewro gênê milanê xo ser o û ma do têkoşînê înan hîna gird bikerê.”
‘Têkoşînê nê embazan êdî ma do rayra berê’
Aktîvîsta TJA’yî Emîne Caynakî zî têkoşîn û cuya şehîdan ard vîrî û wina domna: “Ma heqîqetê şehîdan ser o ciwîyenê. Şehîd Berfîn Nûrhaq, her tim sey kesêka nimûne ciwîyayêne. Xeyalê şehîdanê ma cuyêka azade bîye, nê bingeyî ser o ganî cuyêka senî bêra awankerdene, lazim o ma ey ser o xover bidê. Bi keda şehîdan têkoşînê azadîya cinîyan ameyo astengkerdene. Nê semedî ra wezîfeyê ma zî zaf gird o. Têkoşînê nê embazan êdî ma do bidomnê.”
Merasîmê vîrardişî bi sloganê “Şehîd namirin” qedîya.
