Qezaya Silopî de Esmer Şaîk a 70î serra ya ke bi serran a adirê Newroze bi tena serê xo veşnena û pîroz kena, Esmer Şaîk va ke a no adir seba şehîdanê Newroze veşnena.
Taxa Şehîd Harun a ke girêdayî qezaya Silopîya Şirnexî de Esmer Şaîk a 70 serra ya bi serran a hewşê keyeyê xo de adirê Newroze bi tena serê xo veşnena. Dayîk Esmer adirê Newroze seba kesê ke Newroza serra 1992î ya tarîxî ya Şirnex, Cizîr û Nisêbîn de cuyaya xo dest dayê, veşnena û înan vîr anena.
Esmer Şaîk a ke rojêk verê Newroze hine destanê xo kena, şan de bi adiro ke hewşê keyeyê xo de veşnena, meşaleya xo veşnena. Dima dora adirî de bi meşaleya veşnaya, Newroze pîroz kena. Serê sibayî zî beşdarî pîrozkerdişê girseyî yê Newroza şaristanî bena.
Esmer Şaîk behsê Newroza ke hewşê keyeyê xo de pîroz kena, manayê çalakîya xo kerd.
Esmer Şaîk dîyar kerd ke bi serran a ke bi tena serê xo Newroz pîroz kena û wina va: “Her serre şana Newroze de ez cil û bergê xo yê herêmî xo ra kena û dima zî hewşê keyeyê xo de bi tena serê xo adirê Newroze veşnena. Bade zî adiro ke mi veşnaya, meşaleyêk virazena. Bi meşale destê xo de dora adirî govende gêna. Bi deyîran Newroze pîroz kena, ez no adir seba şehîdanê Newroze veşnena. Verê manayê Newroze seba ma xoverdayîş bî û ma nîşanî dinya daynê ke ma est ê. Taxanê ma cinîyan adir veşnaynê, dora adirî zî govend gêranê. Pîrozkerdişê Newroze ke bi yew kesî destpêkerde nika hetê milyonan yena pîrozkerdene.”
