Maya Rozerîn Çukur Fahrîye Çukur derheqê prosesê aştî de qisey kerd û wina vat: “Heta ke sereyê ma azad nêbo lingê ma azad benê? Abdullah Ocalan wayîrê na dewa yo. Heta o azad nêbo ez azad nêbena. Verê ganî o azad bo.”
Qezaya Amedî ya Sûrî serranê 2015 û 20163î de şahîdê xoverdayîşêko zaf xurt bîye. Qeza de goreyê agahîyanî ke fermî nîyî, 2ê kanune ra ver nêzdîyê 14 reyî qerarê qedexeyê teberî ameyo girewtene. Qedexeyanê teberî de ke aşma êlule de dest pêkerdî, xeylê welatijan cuya xo vîndî kerde. Mîyanê nê kesan de gedeyî zî est bî. Nê gedeyan ra yew zî Rozerîn Çukur bîye. Rozerîn Çukura ke 8ê çeleya 2016î de 16 serrîya xo de hetê sekvananê dewleta Tirkîya ra Sûr de ameye kiştene, 5 aşman ra pey cenazaya aye ameye dayene.
Maya Rozerîn Çukur Fahrîye Çukur derheqê prosesê aştî yo peyêne de û ajansê ma (AW) rê qisey kerd.
‘Mi ewlad vîndî nêkerd, mi dinyaya xo vîndî kerde’
Maya Rozerîn Çukure Fahrîye Çukur behsê kênaya xo kena û wina vana: “Rozerîn gedaya min a verêne bîye. Wexto ke Rozerîn ameye dinya heyatê mi bedilîya. Mi zana dinya est a. Ez tîya de xerîb bîya. A ke ameye dinya her kes ame berê mi ver. Her kesî aye ra zaf heskerdêne. Mi aye erşawite mekteb. Ez bi saya aye banderî her çî bîya. Mekteb çi yo, defter çi yo, qeleme çi ya, ez aye reyde bander bîya. A şîye mekteb seke ez zî aye reyde şîya mekteb. Ge-ge vatêne bê to zî bander bika, mi vatêne nê ti xo rê bixebitîye. Kênaya mi hîkaye nuştêne, şîîrî nuştêne, şîyêne kursê resimî. Cayanê tarîxîyan ra zaf hes kerdêne. Tim waştêne însanan rê ardim bika. Embazanê xo ra hes kerdêne, merdimanê xo ra hes kerdêne. Mi ewlad vîndî nêkerd, mi dinyaya xo vîndî kerde. Gedeyanê mi waya xo vîndî nêkerd, ogretmena xo vîndî kerd.”
‘Eke bariş beno, wa verî qesbaya mayan honik bikê’
Fahrîye Çukur derheqê prosesê aştî de qisey kerd û îfade kerd ke eke na dinya de aştî bena, wa verî qesbaya mayan honik bikerê û wina dewam kerd: “O donem kam başkan bi, ez înan ra heqê xo wazena. Eke na dinya de bariş beno, wa verî bêrê qesbaya mayan honik bikerê. Wa verî bêrê hela ma no dej senî xo vîr ra kenî, ma ma rê bidê xovîrrakerdiş hema wa vajê ma bariş kenê. Semedê barişî keyfê mi yeno. Seba ke ez vana wa êdî kes ewladanê xo rê nêveşo. Eke bariş beno wa ê ke heps û zindanan de yê îna veradê. Eke bariş kenê wa yew barişo heqiqî bikerê. Fekê ma kamî abeno ma vanê reyna sey verî keno. Reyêk kerd hezar hebî însanî merdê, eke na rey biherimîyo bi mîlyaran însan mireno. No însan heyf o. Pê feko na dinya rind bena. O ke vejîya vernîya ma ma dekerdê hendekan, reyna vejîyena û reyna ma dekeno hendekan. Ma nêzanê Ocalan tira çi girewto, înan çi dayo Ocalan. Vanê ma Tirkîya terorî ra pak kenê. Hema vaje ke pak kerde, ma çi girewto, çi dayo ma? Eke çîyêko rind dayo temam, weş o.”
‘Wa Abdullah Ocalan azad bikê’
Çukur dîyar kerd ke wayîrê na dewa Rayberê Şarê Kurdî Abdullah Ocalan o û heta ke o azad nêbo a azad nêbena û wina vat: “Heta ke sereyê ma azad nêbo lingê ma azad benê? Ganî verê sere azad bo dima lingî rehet bê. Sere kamca yo? Ha uca de yo. Wayîrê na dewa qijeye ra heta ewro o bîyo. Milet ey şinasnayo. Abdullah Ocalan wayîrê na dewa yo. Şarî semedê ey ganî ganî adir pana xo ra, xo veşna. Ma xo veşnenê, wa Abdullah Ocalan azad bikê. Heta o azad nêbo ez azad nêbena. Verê ganî o azad bo. Hende yew nenûgî dinya bîya rind, hende yew nenûgî ma nefes girewt. Sûrî heta ewro des serran de ma nê di aşman de yew nefes girewt. Ez vana êdî no dejo ke zerrîya ma de yo ma şênê rehet bidê teber. Hema ma vanê wa sewbîna dejî çin bî. Ma wazenê dinyaya ma rind ba. Apo yê tirkan beno yê kurdan beno. Tirkî zî yê ma yê.”
‘Ma mayê mazluman ê mazluman’
Fahrîye Çukur behsê polîtîkayanê Tirkîya yê înkarî û kiştişî kerd û wina vat: “Kurdî kerdê heme çî la nêkerdo kurd. Înşela ewro ra pey vajo no kurd o. Eke va no kurd o, bizanî ke dewa qedîyaya. La nêvanê, hema zî vanê ma Tirkîya terorî ra pak kenê. Hema zî nameyê ma ‘terorîst’ o. Hema nameyê ma lîsteya terorî ra nêveto. Eke ti şêrê qal bikê vanê ‘no terorîst o, fekê ey padê.’ Ma hema zî mayê terorîstan ê. Ma mayê mazluman ê mazlûman. Gedeyê ma mazlum bîyê. Hema malzumê 16 serre bîyê. Ameyê fekê berê ma de gedeyî kiştê û kerdê terorîst. Verabidayêne ez 10 deqîqeyan de gedaya xo resayêne. Nêvarda ma şêrê û pê topan û tankan veraxo daye ma. Îsraîl nika senî keno însanan, înan zî kerd ma. A deqîqa çi bibîyêne mi girewtêne ez şîyêne. Ez bişîyêne ez zî şîyêne merg. Mi vat wa mi zî bikîşê. Mi vat ez nêşina nê dejî hewana. Hema zî zereyê keyeyî ma de kila adire veşena. Nêverda ez şêra, tayê kateyî dekerdê dayê ma û vat kênaya to na ya. Qey wina qolay o? Qey ma însan nîyê? Qetlê ma kerd helal. Seba ke ma kurd î qetlê ma bi helal.”
‘La eke reyna hêrişê ma kerd ma se kênî?’
Fahrîye Çukur tewr peyên behsê prosesî kerd û dîyar kerd ke kurdan heme çî kerdo la dewlete hema zî yew game nêeşta û wina vat: “Abdullah Ocalan zî vateyê xo kerd, PKK’yî zî kerd. Ê dewlete hema çî çin o. Ma nêzanê se beno. Coka ma vanê ma tira bawer nêkenê. Ma vajî PKK’yî koyî caverdayî şi. Ê la eke înan rê meydan mend û hêrişê ma kerd ma se kenî? Ez nêzana. De ez na dua rê nêvana amîn la înşela rebbî reyna biko amîn. Omidê mi çin o, ma nê sîstemî ra bawer nêkenê. Çunke înan hema yew linge aver nêeşta, hema milet tepişeno, hema koyan bombarduman keno, nê uçaxî wirzenê şonê ça? Hema zî eyn o. De înşela yew barişo xeyrin, yew rindeye biba.”
