Bi hezaran kesî beşdarê pîrozkerdişê Newroze bîyê ke qezaya Wanî ya Erdîşî de qeraxê Gola Wanî ameye kerdene. Beşdaran Newroze de mesajê, “Cuya azade, do Raybero azad reyde bêra” da.
Qezaya Erdişî ya Wanî de bi desan hezar kesî bi sloganê “Newroza Azadî û Yewîya Demokratîke” beşdarê pîrozkerdişê Newroze bîyê û bi pankartê “Cuya azade bi Rayberîya azad do bêra” ver bi qade ameyê. Pîrozkerdişo de ke qeraxê Gola Wanî de ame kerdene, bi sloganê “Bijî Serok Apo” û bi rêzgirewtişî dest pêkerd. Qadî de mesajê piştîdayîşê kurdanê Rojhelatî zî ameyê dayene. Nameyê Komîteya Amadekar ser o Rozerîn Canpolat, bi yadkerdişê Salih Muslimî dest bi qiseykerdişê xo kerd û vat, “Seba resayîşê serkewtişî rayîro tekane xebitîyayîş û rêxistinbîyayîş o. Bijî Serok Apo.” Dima ra hemserek û hemşaredaranê qeza yê DEM Partî zî qiseykerdişê xo kerd.
Hemserekê Şaristanî yê DEM Partî Veysi Dilekçî vat: “Kurdî 50 serrî yo bêmabên têkoşîn danê. 27ê sibate de Rayberê Şarê Kurdî Abdullah Ocalanî prosesê Aştî û Komelê Demokratîkî da destpêkerdene. Dewlete ganî azadîya fîzîkî ya Birêz Ocalanî bîyara ca. Nika Îran de şer est o. Qedênayîşê nê şerî de paradîgmaya Birêz Ocalanî ganî esas girewtene. Eke bêra esas girewtene no şer do biqedîyo û aştî do heme dinya ra vila biba.”
Parlamentera DEM Partî Gülderen Varlî zî wina vat: “Ma game bi game ver bi azadîye şonê. Seba awankerdişê yewîya neteweyî ma rayra şonê. Heta paradîgmaya Birêz Ocalanî bêra caardene, ma do dewe bi dewe, taxe bi taxe bigêrê paradîgmaya ey bidê fehmkerdene. Ma do aştî bîyarê. Seba cuyêka têduşte ez Newroze pîroz kena.”
Parlamenterê DEM Partî Mahmut Dundarî zî wina qisey kerd: “Rayîrê Birêz Ocalanî rayîrê ma yo. 27ê sibate de Rayberê Şarê Kurdî Abdullah Ocalanî prosesêk da destpêkerdene. Îqtîdar ganî êdî game bierzo û bilez azadîya fîzîkî ya Abdullah Ocalanî bîyaro ca. Ma do 4 parçeyanê Kurdîstanî de aştî awan bikerê.”
Qiseykerdişan ra pey Dayîkanê Aştî adirê Newroze wekerd û muzîkjen Kasım Taşdoğan sehne girewt.
