Qezaya Farqînî de hêrişê vera tabelaya Parka Rojîn Kabaîşe ame şermezarkerdene.
Hemsereka Farqînî Sevîm Bîçîcî dîyar kerd ke no hêriş tena vera tabelayêk nîyo, eynî wext de hêrişêko vera estbîyayîş û rêxistinbîyayîşê cinîyan ê warê cemawerî de ameyo kerdene. 18ê hezirane de hetê kesanê ke nasnameyê înan nîno zanayene ve vera tabelaya Parka Rojîn Kabaîşe hêriş ame kerdene. Hemserekê Farqînî, xebatkarê şaredarîye û endamê Meclîsê Cinîyan no hêriş qeza de şermezar kerd. Girseya ke verê banê şaredarîye de kom bîye, heta Parka Rojîn Kabaîşe rayîrşî û bi eşkerayîyêk hêriş şermezar kerd. Hemserekê Farqînî Sevîm Bîçîcî û Kadrî Esen, endamê Meclîsî yê cinîyan û xeylê cinî beşdarê eşkerayîya protestoyî bîyî.
Hemsereka Farqînî Sevîm Bîçîcî ya ke eşkerayîye de qisey kerd û vat ke no hêriş tena vera tabelayêk nîyo, eynî wext de hêrişêko ke vera estbîyayîş û rêxistinbîyayîşê cinîyan ê warê cemawerî de ameyo kerdene. Sevîm Bîçîcî dewamê qiseykerdişê xo de wina vat: “No hêriş, sey helwestêk hişmendîya merde-serdeste ke vera komelkîbîyayîş û asayîşê cinîyan ê cuyeya cemawerî de yeno erjnayene. Tena Parka Rojîn Kabaîşe ney, sere de Parka 8ê Adare, ma parkanê xo yê bînan de zî bi nê problemanê winayînan rî bi rî manenê. Vera na hişmendîya zordeste û merde-serdeste ya serê warê cuyeya cinîyan, têkoşînê cinîyan do bi qerardarî dewam bikero.”
Eşkerayîye de ame zanayene ke derheqê hêrişê vera tabelaya parke de kar û barê huquqî yê lazimî ameyê destpêkerdene.
