Ziwanzan û Xebatkarê Şaredarîya Amedî Zana Farqînî aşkera kerd ke bernameyê înan ê 21ê Sibate dîyar o û çarçiweya xebatê xo ê do bazaran bigêrê û etîketê bi kurdkî yê nameyê zebze û fekîyan bi kirmanckî û kurmancî bidê esnafê bazarî rê.
Neteweyê Yewbîyayîye ra girêda Rêxistinê Kultur, Zanistî û Perwerdeyî (UNESCO) serra 1999î de roja 21ê Sibate sey “Roja Ziwanê Dayîke ya Mîyanêneteweyî” qebûl kerd. Îlanbîyayişê na roje ra nika na roje seba averşîyayişê ziwanî yena firazkerdêne. Goreyê malûmatê UNESCO’yî 7 hezar ziwan ser Dinya de yenê qisekerdiş labelê seyî ra 40î nê ziwanan çinbîyayiş û asîmîlasyonî reyde rî bi rî de yê.
Tirkîya de 18 ziwanî çi heyfo ke helîya û vînî bîyê. Ziwanê kurdkî zî polîtîkayê asîmîlasyon û qedexekerdişî ser o hîna binê telûkeyîye de yo. Sazî û dezgeyê ziwanê zî seba hîşmendî, balantişê telûkeyê asîmîlasyonê yê ziwanê kurdkî ser o na roje de tewir bi tewir çalakî organîze kenê.
Ma do şayî bivirazê
Ziwanzan û Xebatkarê Şaredarîya Şaristanê Girde ya Amedî Zana Farqînî seba malûmatdayişê xebat û programê şaredarîye ser o ajansê ma rê qal kerd.
Zana Farqînî dîyar kerd ke seba 21ê Sibate Roja Ziwanê Dayîke ya Dinya ê fikrîyanê ke sey hewteyêko çalakîyan bivirazê û wina va: “Xebatê şaredarîya girde do şaredarîyê merkezî yê Amedî reyde pîya bikerê. Ma bazaran bigêrê û etîketê bi kurdkî yê nameyê zebze û fekîyan bi kirmanckî û kurmancî bidê esnafê bazarî rê. Kokartan hadre bikê û esnafan seba ke camê xo ra bi elaqnê (akerdiş, padayiş û şima bi xêr ameyê) lolipop bidê înan.”
Broşurê ma hadre yê
Farqînî vîr ard ke ê hewna broşurêk hadre bikê, bi ziwanê tirkî, ermenkî, suryankî û lehçeyê kurdkî kirmanckî û kurmancî yê broşur de manayê 21ê Sibate çîyo? bidê famkerdêne û hewna do ê şayî bivirazê û pankart û afîşê xo zî ê hadre kerdê.
Xizmetê Alo Kurdkî
Farqînî ard ziwan ke seba xizmetê kurdkî ê sey Alo Kurdkî xizmetêk organîze kerd û wina qedîna: “Ma bi no xizmetî, kesê ke biwazê nameyê domanê xo bi kurdkî bironê ya zî termê kurdkî yê teknîkî, hetkarî biwazê rê ma hetkarîya bidê înan. Ma termê şaredarîye yê îdarîye do hadre bikerê, seba fikir dayişûgirewtişî rê sazî û dezgeyê şaristanî de têkilîya ma est a, ma wazenê înan reyde pîya çi bikerê û hetkarîya yewbînan û karbeşî senî bikerê ser fikrîyenê la xususî xebatê ma ser 21ê Sibate yê.”
