Mehmet Mazhar Kaynak, nêweşîya Hîdrosefalî ra 2 gedeyê xo vînî kerd û 3 gedeyê ci zî çi heyfo ke deja na nêweşî kewt. Mehmet Mazhar Kaynak rayedarê dewlete ra veng da.
Keyeyê Mehmet Mazhar Kavak û Muyezen Kavake, qezaya Rêzanî ya Amedî de cuyeno. No keye, verba nêweşîya gedeyanê xo de têkoşînêk dano. 6 gedeyî keyeyî est ê û 5 gedeyê keyeyî nêweşîya Hîdrosefalî ra kewt.
Di gedeyê xo vînî kerd
Keyeyê Kavakî de ewil serra 2010î de kênaya înan Eyleme nêweşîya Hîdrosefalî ra kewt, Eylem 21 serra xo de cuya xo rîyê nêweşîye vînî kerd. Dima zî kênaya înan Zozane 19 serra xo de nêweşîya hîdrosefalî ra cuya xo vînî kerd.
Trajedîya keyeyî çi heyfo ke dewam kerd. Hewna kênaya înan Rezan Zengîn (30), rîyê nêweşîya Hîdrosefalî ameliyat bî, kênaya înan a bîn Hasret Dogu (28) zî bi şikê tumorî binê tedawîye ame girewtiş.
Doktorî bêçare mend
Mezgê Nurhat Kavake de zî tumor vejîya û doktoran vatê ke amelîyatê Nurhate zaf zehmet o û no ser ê nêeşkenî bikerê.
Babete ser o Mehmet Mazhar Kavak va ke ê xususî wazenê Nurhat bidê cuyakerdiş, çimkî 2 aşmî emrê Nurhate menda û wina va: “Ma heme mal û milkê xo biroşî do seba weşîya kênayanê xo la ma ewil wazenê wa Nurhat biciwa. Her ke şona rewşa Nurhate giran bena. Ma çewî ra pere nêwazenî, tena wazenî doktorî ke kênayanê mi weş bikerî û cîhazî bêrê temînkerdiş.”
