Pîrozkerdişê Festîvala Rojanê Amara ya 77 serrîya Rojbîyayîşê Rayberê Şarê Kurdî Abdullah Ocalan yena viraştene dewam keno. Pîrozkerdiş de fotoyê Rayberê Şarê Kurdî Abdullah Ocalanî ame akerdene.
Komîteya Amadekar a Festîvale bi sloganê “Bi Rayberîya Azad ver bi Yewîya Demokratîke” parka 4ê nisane ya qezaya Xelfetî yê Riha de programê pîrozkerdişê Rojbîyayîşê 77 serrîya Rayberê Şarê Kurdî Abdullah Ocalan viraşt. Festîvale seba cangorîyanê azadîye bi deqîqeyêke rêzgirewtişî dest pêkerd. Wextê rêzgirewtene de girse bi yew vengî marşê “Çerxa Şorişî” wend. Bi hezaran kesî tewrê festîvale bîyê û bêmabên sloganê “Rojbîyayîşê to pîroz bo ey Serek Apo” û “Bijî Serok Apo” berz kerd.
Badê rêzgirewtişî Komîteya Amadekar şar selam kerd. Sewbîna zî çarçewaya pîrozkerdene de komxebata gedeyan ame viraştene û nawitgehê fotografan ame akerdene. Komxebata gedeyan û nawitgehê fotografan do heta saete 20:30 akerde bo.
Hemsereka DEM Partî yê Riha Ayşe Surucu programê pîrozkerdene de qisey kerd. Ayşe Surucu şar selam kerd, rojbîyayîşê Rayberê Şarê Kurdî Abdullah Ocalanî ro pêroyî şarî pîroz kerd û waştena azadîya fizîkî yê Abdullah Ocalan kerd.
Badê qiseykerdişê Ayşe Surucu hunermendê herêmî Servan Rihayî vejîya sehne ser û bi deyîranê xo pîrozkerdiş geş kerd. Girseyêka kom bîbî deyîran reyde sloganî eştî û govende çarna.
Sewbîna zî festîvale de fotoyê Rayberê Şarê kurdî Abdullah Ocalanî yo gird ser o “Bijî Serok Apo” nuştebî ame akerdene.
Festîvale bi deyîranê Servan Rihayî dewam keno.
