Amed – Maya Fexrîye Yildirim a ke lajê aye Medenî Yildirim netîceyê gulebaranê dewlete yê serê çalakîya protestoyî yê vera viraştişê qereqolî de cuya xo ra bibi, qisey kerd. Fexrîye Yildirim bi hîsdarîyêka girde behsê cuya lajê xo, her di rojanê peyênan yê verê qetlîamî û bêcezaverdayîşê kiştoxan kerd.
28ê hezîrane 2013î de dewa Hêzan a qezaya Licê ya Amedî de wextê protestokerdişê viraştişê qereqolan de cendirmeyanê Qereqolê Hêzanî şarî ser o gulebaran kerdbi. Wextê gulebaranî de Medenî Yildirim o 18 serre cuya xo ra bi û 9 kesî zî bi giranî birîndar bîbî.
Badê qetilkerdişê Medenî Yildirimî hetê mufetîşanê Mulkîye yê Wezaretê Karanê Zereyî ra raporê vercigêrayîşî ame hedrekerdene û pêşkeşê Serekîya Heyetê Teftîşî ame kerdene zî Serdozgerîya Komare ya Licê cipersayîşê de ke girêdayeyê hedîse ameyêne rayraberdene, qerarê bêwezîfedarî dabi.
Maya Medenî Yildirimî, da zanayene ke lajê aye Medenî wendekarêko serkewte û kesê ke aştîyane û bi hurmet bi, seba wendişê unîversîte amadekarî kerdêne. Maya ci dîyar kerd ke Medenî her wext terefgirê aştî û çareserî bi. Na hedîse tarîxê têkoşînê şarê kurdî de sey rîpelêko sîya yê bêedaletî cayê xo girewt.
‘Medenî aştîwaz bî û seba amancê xo wendêne’
Fexrîye Yildirim îfade kerd ke ke lajê aye seba hedreyîya unîversîte dersxane de wendêne û amancê ey o bi ke bieşko xizmetê şarê xo bikero. Fexrîye Yildirim wina vat: “Medenî lajekêko zaf bihurmet û aştîwaz bi. Wextê prosesê çareserî de her wext vatêne ganî aştî virazîya û merdimî pêro pîya bibê yew. Ey tena di rojî verê şehadetî îmtîhanê xo yo peyên dabi paweyê netîce bi.”
Şewa peyêne û hedîseya qaleqolî
Fexrîye Yildirim vist vîr ke dewa înan de qedexeyê vejîyayîşê teberî û tedayê leşkerî bîbî û viraştişê qereqolê neweyî ser o şarî nêrazîbîyayîş dayêne mojnayene. Şewa hedîse de semedê nêweşîya pîyê înan, birayê pîlî qerar danê ke şêrê cayê çalakî la ciwanan rayîr nêdayo înan. Fexrîye Yildirim îfade kerd ke Medenî uca de maneno û keweno mîyanê hewldananê pawitişê heqê şarî.
Fexrîye Yildirim dewamê qiseykerdişê xo de wina vat: “A şewe Medenî zaf bi fikar bî. Vatêne ez tena çareserî wazena. Serê sibayî şi nimaj ame û wextê ke agêra, mi dî ke salone de hêsrê çimanê ey ra yenê. Badê şi warê qereqolî ke nerazîbîyayîş bimojno.”
Kiştoxî ameyî veradayene: Dewlete ma de xayîn a
Fexrîye Yildirim bale ante serê prosesê muhakemekerdiş û veradayîşê kiştoxanê lajê xo û dîyar kerd ke sîstemê huqûqî de ke est o edalet seba kurdan nêyena ca û babete ser o wina dewam kerd: “Kiştoxê lajê mi verê bi 18 serran ameyêne hukmkerdene, dima ra kerd 8 serrî û peynî de zî beraat kerd. Dewlete ma de xayîn a, goşdarî ma nêkena û mezelanê ma ra tersena. Ê yê ke hêrişê erjanê ma kenê bêhurmet ê.”
‘Hêvî û çareserî bi yewîya ma mumkin ê’
Peynîya qiseykerdişê xo de Fexrîye Yildirim vengdayîşê şarê kurdî kerd ke tena bi yewîye eşkenê serkewê. Fexrîye Yildirim dîyar kerd ke her çiqas teda, girewtiş û kiştiş serê sîyasetmedar, ciwan û şarê kurdî de dewam bikerê zî ganî têkoşînê seba aştîyêka birûmet dewam bikero. Fexrîye Yildirim qiseykerdişê xo wina qedêna: “Homa heqê şehîdanê ma vîndî nêkero. Ez hêvî kena ke rojêke aştî û azadî seba nê şarî virazîya.”
