Fînlandîya de bi îdîayê “fînansmanê terorîzmî” hîrê aktîvîstê kurdî ameyî destbendkerdene. Destbendkerdişî wextê zîyaretê Wezîrê Karê Teberî yê Tirkîya Hakan Fîdanî yê Fînlandîya de bîyî.
3ê teşrîna peyêne 2025î de Fînlandîya rojhelatê başûrî de çarçewaya cigêrayîşê “fînansmanê terorîzmî” yê ke Îdareyê Cigêrayîşê Neteweyî (Keskusrîkospolîîsî-KRP) rameno, Naîm Acar, Ramazan Koyun û Metîn Çelîk ameyî destbendkerdene. Badê destbendkerdişî keyeyan de û Merkezê Komelê Kurdî yê Helsinkî de cigêrayîş ame kerdene.
Komelê kurdan ke Fînlandîya de ciwîyenê ard vîrardene ke destbendkerdişî wextê zîyaretê Wezîrê Karê Teberî yê Tirkîya Hakan Fîdanî yê Fînlandîya de bîyî û îfade kerd ke prosesî hemsengîyêka sîyasî est a.
Beyanatî de ke hetê Meclîsê Şarê Kurdî ra ame dayene ame dîyarkerdene ke kurdê ke Fînlandîya de ciwîyenê, hurmetdarê qanûnan ê, komelî rê adapte bîyî ya û ame îfadekerdene ke zaf normal û heqêko bingeyin o ke dezgeh û erjanê xo rê wayîrîye bikerê. Beyanatî de ame vatene: “Heqê rêxistinebîyayîşî yê kurdan, heqê xo yê erjanê sîyasîyan û kulturîyan rê wayîrîye kerdene, heqêko global o.”
Ame dîyarkerdene ke keyeyî hona nêresayî melumatêko kefî û zelal derheqê destbendbîyayan de û hat waştene ke proses huqûqî, transparan û adîlane bêro ramitene.
Kurdanê Fînlandîya eşkera kerd ke seba reaksîyonî roja îneyî (meşte) saete 12:00î de Helsinkî de vernîya Wezaretê Karê Zereyî do çalakîyêka protestoyî virazê..
Adresa çalakîya protestoyî:
Adrese: Kîrkkokatu 12, Helsinkî
Tarîx û Saete: Îne, 12:00
