Aktîvîsta TJA’yî Ayşe Aksoy û Dayîka Aştî Bedîa Gokyuz dîyar kerd ke Şorişê Rojava bi keda cinî vejîyayo orte û vat: “Ma qebul nêkenê ke tu destkewteyê şarê kurdî orte ra bêrê wedaritene. Ganî destkewteyê cinîyanê kurd bêrê pawitene.”
Çeteyê Hukmatê Demkî yê Sûrîye 6ê çele de hêrişê taxanê kurdan ê Şêxmeqsûd û Eşrefîye yê Helebî kerd. Şer de xeylê sîvîl û hêzanê pawitişî yê şaristanî zî dinyaya xo bedelnaye. Eyn hêrişî vera Rojava dewam kenê û çeteyêk kezîyê şervanêka cinî birna. Vera heme hêrişanê Rojava YPG, YPJ û HSD’yî cewabêko hişk da û seba wayîrvejîyayîşê destkewteyanê cinîyan, destkewteyanê kurdan û pawitişê Rojava heme kurd û dostê kurdan vejîyayê qadan. Encamê têkoşînî de 30ê çele de Rayberîya Xoser û Hukmatê Demkî yê Sûrîye bi mabênkarîya Amerîka û Fransayî peymanêk ameye îmzakerdene û s-şer vindert.
Aktîvîsta TJA’yî Ayşe Aksoy û Dayîka Aştî Bedîa Gokyuz derheqê hêrişanê vera Rojava û xoverdayîşî de rolê cinîyan ser o ma rê qisey kerd.
‘Cinîyanê kurd şorişê cinîyan kerd’
Ayşe Aksoy îfade kerd ke hêrişê verqa cinîyan verî ra est ê û wina qisey kerd: “Demê awanbîyayîşê dinya ra heta nika cinîyan ser o hêrişî est ê. Hêrişê vera cinîyan û şervananê kurd ê cinî ser o cîya yê. Seba ke cinîya kurd dinya de şorişê cinî kerdo, nê hêrişî ameyê kerdene. Eya, serewedaritişê cinîyan bîyê, cinîyan tayê heqî girewtê. La dnya de şorişê cinî yo yewin cinîya kurd kerdo. Sebebê hêrişanê vera cinîyan nê bingeyî ra yenê. Ewro cuye estbîyayîş û çinbîyayîşê cinî ameya awankerdene. O semed ra ewro cinîyê kurdî yenê hedefgirewtene. Demo ke Rojava de şer destpêkerd, cinîyêka şervane hetê çeteyan ra awanî ra ameyê eştene û kezîyê cinîyêk ame birnayene. No hêriş şexsê şeervana cinî ya kurd de vera heme cinîyan ame kerdene.”
‘Şorişê Rojava bi keda cinî vejîya meydan’
Ayşe Aksoy dewamê qiseykerdişê xo de ard vîr ke Şorişê Rojava dewamê têkoşînê cinîya kurd ê 40 serrî yo û vat: “Cinîya kurd dewaya estbîyayîş, nasname û azadîya xo kerd û nê rayîrî de xeylê bedê zî da. Ma zanî ke Şorişê Rojava bi keda cinî vejîya meydan. Demo ke şervana kurd qatanê corî ra ameyê eştene û kezîyê ci ameyê birnayene, hêrsê cinîya kurd zaf vêşî bi. Vera nê heme dinya werişte lingan ser o. Cinîyî ke kurd nîyê, ê zî vera nê hêrişî veng vet. Xoverdayîşê Rojava de rolê cinî xeylê muhîm o. Na rey zî cinîya kurd bîyê hedefê hêrişan. La şarê kurdî vera hêrişanê Rojava werişt lingan ser o. Pêroyê dinya dî ke û cinîya kurd sere nêtewnena.”
‘Cinîya kurd wayîrê hêzî ya’
Ayşe Aksoy dîyar kerd ke ewro yeno waştene ke şarê kurdî destkewteyê şarê kurdî bêrê hewanayene, bi taybetî zî destkewteyê cinîyanê kurd. Ewro cinîya kurd wayîrê hêzî ya, hêzê aye yo pawitiş û leşkerî est o. Xoverdayîşê cinîya kurd ewro ameyo daraxêka berze û cinîyanê dinya rê nimûne yo. Ganî pêroyê cinîyê dinya veng vejê û lingan ser o bê. Rojava bi keda serran ameyo awankerdene. Ganî pêroyê dinya destkewteyanê cinîyanê kurd bipawo.”
‘Ganî cinîyê kurdî wayîrê hêzî bibê’
Dayîka Aştî Bedîa Gokguz zî dîyar kerd ke îmzakerdişê peymana Rojavayî de cinîyan rolêko muhîm girewt û wina qisey kerd: “Xora cinî Rojava de wayîrê hêzî yê. O semed ra ewil hêrişê cinîyan kerd. Rojava de cinî xover danê ewro pêroyê dinay de zî cinî lingan ser o yê. Ganî heme cinî xo ra bawer bibê.”
‘Ganî pêşengê kurdan zî bibê yew’
Bedîa Gokyuz bale ant muhîmîya peymana ke ameya îmzakerdene û derheqê babete de nê çîyî vatê: “Rojava de peymanêk est a ka hema zî dorpêçê Kobanî ser o dewam keno. Berê sînorî girewte yê seba ke hêrişan de destê Tirkîya est o. Wa dewleta Tirkîya destanê xo şarê kurdî ra bianca. Ganî şarê kurdî bibo yew ke êdî gonîya şarê kurdî nêra rişnayene. Xora şarê kurdî bi rojan o lingan ser o yo, ganî pêşengê şarê kurdî zî bibê yew. Ganî cinîyê kurdî zî wayîrê hêzî bibê û hemverê dişmenanê xo de vinderê.”
