Hemsereka ÎHD’ya Colemêrgî Sîbel Çapraz dîyar kerd ke rewşa tepişteyan bi taybetî zî binpaykerdişê heqan ê hemverê tepişteyê sîyasî her ke şino giran beno û va, ganî dewlete na saete ra tepîya gamanê somutan bierzo.
Badê vengdayîşê ‘aştî û komelê demokratîkî’ yê Rayberê Şarê Kurdî Abdullah Ocalanî 27ê Sibate de kerd, PKK’yî eşkerayîya 9ê Gulane de dîyar kerd ke 12ine kongreya xo pê ard û qerarê fesihkerdişî da. Hemverê nê de hema dewlete gamê pozîtîfî nêeştê. Heto bîn ra zî zîndanan de rewşa tepişteyan zehmet bena û bi taybetî zî binpaykerdişê heqan yê hemverê tepişteyanê sîyasîyan dewam keno.
Goreyê raporê ÎHD’yî yê 28ê nîsane zîndanan de tewr kêmî 335 ci ra giran bi pêroyî hezar û 412 tepişteyê nêweşî est ê û nînan ra 161 hebî cinî yê û hezar û 251 zî camêrd ê.
Hemsereka ÎHD’ya Colemêrgî Sîbel Çapraz derheqê rewşa tepişteyan de jinnewsî rê qisey kerd û va ganî pêro tepişteyî bêrê veradayîş.
‘Ganî gamê somutî bêrê eştiş’
Sîbel Çapraz wina qal kerd: “PKK’yî qerarê feshî da. La heta nika dewlete gamanê somutan nêeşta. Ma semedê nê nêeşkenê prosesê aştîye biercnê. Ganî zemînêk baş bêro awankerdiş û hewcedarîyê prosesî bica bêrê. Seke şima zanê pêrodayîşêk bi serran dewam keno est o. Xeylêk kesî zirar vîna. Semedo ke no proses baş derbas bo, ganî gamî bêrê eştiş. Ganî paştdayîşê semedê prosesî bêro dayîş. Hîn raştîyê ke ganî bêrê akerdiş est ê. Nînan ra yew zî tepişteyê nêweş ê. Yê rewşa înan giran est ê. Ganî derheqê nê de sererastkerdişêk bêro kerdiş.”
‘Wezîrê edaletî zelal nêzdî beno’
Sîbel Çapraz dîyar kerd ke ganî îqtîdar goreyê qanûnê gerdunî yê heqê merdiman ê mîyanneteweyî têbigêro û ganî tepişteyanê nêweşan tehlîye bikero û wina va: “Yew gama somut ke bêro eştiş, veradayîşê tepişteyanê nêweşan o. Hewldayîşê ma est o. Pêvînayîşê ma yê muxataban dir est o. Wezaretê edaletî na babete de zelal tênêgêreno. Tepişteyê nêweşî ganî biresê azadîya xo.”
