Hepso nêweş Nîmet Degîş ke badê 30 serrî û 8 aşman Adara 2023 de amebî veradayîş, seba ke 9 aşmê cezayê hepsî ci rê birniyabî, 2ê Gulane de reyna tepşiyabî. Nîmet Degîş ê ke 9ê Gulane de bi şertê kontrola edlî ame veradayîş, va ke ganî hepsîyê nêweşî rojêk zî hepisxane de nêmanê.
Hepso nêweş Nîmet Degîş (68) o ke Hepisxaneyê Tîpa S a Kirşehîrî de ameybî tepêştiş, badê 30 serrî û heşt aşman 11ê Adara 2023î de amebî veradayîş. Wexto ke Nîmet Degîş û çend embazê xo yê ke Hepisxaneyê Tîpa F a Bolûyî de mendêne, 2ê Çileya 2014î de serê kameraya ke hewşa koxuşî ke tede mendêne ra ewniyayêne, ardbî war û hesinê aye çewt bibî. Mahkemaya Infazê ya Bolûyî bi idiaya “Zirarê malê şarî kerdo” 9 aşmê cezayê hepisî Nîmet Degîş rê birnabî. Seba Mahkemaya Qanûnê Bingeyînî na ceza qebul kerdibî, Nîmet Degîş 2ê Gulane de reyna ame tepiştiş û o berdî Hepisxaneyê Abiyayeyê Amedî. Seba ke nêweşiyê Degîş ê zey faranjît, guatr, fitiq, velik, mide, prostat, nêeşnawitiş, estikan, sendroma lingan, vertîgo û rûvi estbî zî, o ame tepiştiş.
Nîmet Degîş 3 rojan Hepisxaneyê Abiyayeyê ke mîyane Kampusê Hepisxaneyê Amedî de mend û badê o berdî Hepisxaneyê Abiyayeyê Tekelê yê ke Taxa Medya yê qezaya Peyasê Amedî de yo. Nîmet Degîş 9ê Gulane de bi şertê kontrola edlî ame veradayîş. Nîmet Degîş nika hefteyê di rey îmza erzeno û aşme de rayêk zî semîneran ra beşdar beno. Nîmet Degîş badê 3 aşman do hefteyê rojê îmze bierzo û na rewşe do heta 9 aşman dewam bikero. Nîmet Degîş derheqê rewşa hepisxaneyî de ajansa ma rê qisey kerd.
‘Nezdîyê 100 kesî cayêkî de rawkenî’
Nîmet Degîş balê xo ant ser problemanê hepisxaneyê abiyayeyî û wina va: “Ci rê vanê hepsa abiyaye la rastiya aye wina niya. Seba cuyo normal munasibi niya. Hetê cuyayiş û pakerdişî ra problemî estbî. Nezdiyê 100 kesî cayêkî de rawkenî. La o ca zî zey axurî yo, zaf xirab o. Merdim şeno vajo ke zey cayê rehabîlîtasyonî yo. Xo hûmaran de danê hiskerdiş. Her roj 5-6 rayî, ra ra zî 7 rayî yenê hûmare. Zey qişla û nîzama leşkerî ya. Hetê revîrî ra ez roja dişeme (5ê Gulane) şiya revîrî, roja ênî (9ê Gulane) derman ame. Yanî panc rojan de derman ame. Ê zî dermanê mi nêardî. Tena qutiyê antîbiyotîk ardî. Tehdîdê ser girdkerdeyan est o. Vanê; şima goreyê ma hereket nêkerê, şima do hepisxaneyo abiyaye ra şêrê yê qefelnayeyî. Nîzama xo bi nê tehdîdî virazenê.”
‘Bi hawayê nêweşî û ser paştê mi 8 rojan tepêştî’
Nîmet Degîş dewamê qiseykerdişê xo de nê melumatî dayî: “Gereka hepisxane de qeydê mi yê kewtişî viraştêne û ez vejyayne. Bi nê hawayê nêweşî ser paşte 8 rojan ez uca de veradîyaya. Nêweşê winasî zî uca de est ê. Hepsîyê ke emrê înan pîl o, estê ke nêeşkenî, şert û mercan de bimanê. Ez rehet nêbiya. Embazan çend rey ê têkoşîn dayî ke mi bibêrê nêweşxane. Destê mi kelepçe nêkerdî la nêweşxaneya kampusî de destê ciwanikî kelepçe kerdibî û wina gonî ci ra girewtî. Badê mi berdî Nêweşxaneya Cigêrayiş û Perwerdeyî ya Gazî Yaşargîlî ya Amedî.”
‘Embarê Tekelî kerdî hepisxane’
Nîmet Degîş da zanayiş ke wexto ke o ame tepiştiş, ewilî o berdî Hepisxaneya Kampusê Amedî, badê o berd Hepisxaneya Abiyaye ya Tekelî û nê vatî: “Hepisxaneyê Abiyaye Caddeya Tekelê ser o yo. Embarê Tekelî kerdî hepisxane. Coka hijyen, pakerdiş çin o. Şewe de hende merdimî ser yewbînî de cayêkî de manenê, merdim nêeşkeno nefes bigêro. Rey vengî ma kerdî, ma berdî hetê melayî. Ma goşdarî nêkerd, bi xo qisey kerdêne. Zêdeyêr girdkerdeyê edlî yê ke musluman niyê û yê ke musluman ê, têmiyan de nê problem vejiyenê.”
Wendiş kerd sazgehanê heqanê merdiman û huqûqî
Nîmet Degîş veng da sazgehanê heqanê merdiman û huqûqî û wina va: “Gereka sazgeyê heqanê merdiman ser nê probleman vinderê. Nê sazgeyî şêrê nê hepisxaneyan kontrol bikerê. Stargehê heywanan zî wina niyê. Gereka hepsîyê nêweşî rojêk zî hepisxane de nêmanê. Gereka ê û hepsîyê pîrî lezûbez bêrê veradayiş. Hepsîyê nêweşî zaf ê, şert û mercê hepisxaneyan êdî nêyenê antiş. Goreyê wextî hovitî ya. Hepsîyê nêweşî umûmen nêbenê nêweşxaneyan, eger berê zî destê xo kelepçekerdeyî yenê dermankerdiş. Ê zî bi lezûbez benê û anê.”
