Rayberê 78an Hasan Esen bal ant ser projeya dewlete ya lêşînî û wina va: “Ma wazenê do Hepisxaneyê Amedî yê Tîpa E’yî bibo muzeya vîr û heqê merdimanan. No ser ganî ma verba projeya dewlete de bivinder ê û wayîrê vîra xo bivejîme.”
Par verê ameyişê Serekkomar Erdoganî, Hepisxaneyê Amedî yê Tîpa E’yî vila kerdbî û dima zî ameybî musayiş ke no hepisxane bibo, muzeya kulturî. Na projeya dewlete ra Komeleya 78an reaksîyon nîşan dana û wazena no hepisxane bibo Hepîsxaneyê Heqê Merdiman. No hepisxane pêroyî dinya de yeno zanayiş ke cayê zilm û îşkenceyî yo. Rayberê 78an Hasan Esen zî no hepisxane de mendo, îşkence û zilm dîyo.
Rayberê 78an Hasan Esen ajansê ma rê qise kerd.
Rayberê 78an Hasan Esen va ke o zî serra 1983î de Hepisxaneyê Amedî yê Hûmara 5ine de mendo û wina va: “No dem zaf îşkence estbî, 52 rojê çimanê mi girewte bîyê. Zaf zilimkar bîyê, kutikê zilimkar Esat Oktayî yê nameyê Co bî, estbî û bi no kutikî zî ma rê îşkence kerdinî. Çimê ma girewte bî û her tim îşkence estbî. Ê ke qise nêkerdinê înan ra zaf îşkence kerdinê, kesê qise kerdê zî înan berdê qoxişê rindî û peynî zî tehlîye kerdinê. Zaf kesê seba ke qise nêkerdê ya kişîyayî ya îşkence ra vîyartî ya zî cezayê girane girewtê. No dem îdam estbî û bi cezaya îdamî zî mi muhamekerdinî, peynî ez tehlîye bîya.”
Ma wazenê na proje bivindernê
Hasan Esen aşkera kerd ke hepisxaneyî ke o mendo, nika kerdê xirabe û kenê muzeya kulturî û wina domna: “Bi no rayîrî Dewleta Tirk wazena şopê îşkence û zilmî, hafizayî ra pak bika. No zî projeyêka lêşîn a. Komeleya 78an verba na proje de ya, komele wazena na proje bivinderna. Eke bêvengî bibo do dewlete do goreyê xo bika.”
Dinya û her kesî zî zana ewta de zilmêko gird bîyo
Esen bal ant projeya Komeleya 78an û wina qedîna: “Ma wazenê do no hepisxane bibo muzeya vîr û heqê merdiman. No ser ganî ma verba projeya dewlete de bivinder ê û wayîrê vîra xo bivejîme. Ma wina bikerê ke no şop vînî nêbo, çimkî kurdê ma uca de îşkence û zilim dîyê. Projeyêka ma esta û ma wayîrê projeya xo bivejîme. Hepisxaneyî xo vîra mekerîme, ganî vîra ma ra pak nêba la dewlet wazena vîra îşkenceyî pak bika, sey ke qet îşkence û zilm nêbîyo. Dinya de tewro gird zilm û îşkence ameyo kerdiş, Hepisxaneyê Amedî yê Hûmara 5ine yo. Dinya û her kesî zî zana ewta de zilmêko gird bîyo, şarê ma qetil kerdê û şarê bî telef. No ser ganî ma xo ra vîra nêkerê û wayîr bivejîme.”
