Keyeyê girewteyanê bi nameyê Seyda Şîmşek û Firat Bîlen ke Hepisxaneyê Amedî de yenê girewtene, dîyar kerd ke rixmê prosesî zî hepisxane de zilm dewma keno û veradayîşê girewteyan Firat Bîlen û Mehmet Şîrîn Polat ameya taloqkerdene.
Girewteyo bi nameyê Seyda Şîmşek ke nêzdîyê 30 serrî yo girewte yo û nika Hepisxaneyê Ewlekarîya Berze yê Hûmara 2. yê Amedî de yeno girewtene. 30ê teşrîna peyêne ya 2025î de 30 serrî ey pir benê û ganî bêro veradayene. Birayê Seyda Şîmşek, Hesen Şîmşek vizêr birayê xo reyde pêvînayîş kerd û derheqê binpaykerdişanê girewteyan de ajansê ma rê qisey kerd.
‘Şert û mercê zindanî zehmet ê’
Hesen Şîmşekî da zanayene ke sey keyeyê Seyda Şîmşek înan nêm saete pêvînayîş kerdo û wina vat: “Vat şert û mercê zindanî zehmet ê û rayberîya zindanî înan rê zilm kena. Tena înan rê nê heme girewteyan rê kenê. Tayê embazê îna ke cezaya ke înan rê ameya dayene qedîyaya la reyna zî veradayîşê înan di reyî ameyo taloqkerdene. Veradayîşê Firat Bîlen û Mehmet Şîrîn Polatî di reyî seba 6 aşman ameya taloqkerdene.”
‘Embazan rê poşmantî ferz kenê’
Hesen Şîmşekî îfade kerd ke girewteyê şîyayîş û ameyîşê nêweşxaneyî de zî probleman ciwîyenê û wina doman: “Goreyê prosesî nêzdîbîyayîşê mudirê hepisxaneyî baş nîyo. Dozgerê Înfazî par vengda birayê mi û ey ra vatbi 29 serrî to qedîyayî, ganî ma to veradî. La ganî ti vajî ‘ez poşman a.’ O zî vano ‘ez poşman nîya, kesanê ke ez dekerda tîya wa poşman bî.’ Xeylê embazan rê poşmantî ferz kenê. Embazî zî nê qebul nêkenê. Seba poşmantî qebul nêkenê, vanê seba ke ey vajî ‘ma poşman ê’ şert û mercanê înan giran kenê. La embazê girewteyî vanê, ‘wa baş bizanê ke ma poşman nîyê!’.”
‘Nê prosesî de her ke şono problemî vêşî benê’
Hesen Şîmşek bale ant prosesê nikayînî ser o û nê çîyî vatî: “Seyda vat ganî nê prosesî de şert û mercê înan hîna giran nê sivik bibê la çi heyf ke eksê ci kenê. Nê semedî ra her ke şono problemî vêşî benê. Ma wazenê komel nê ra haydar bo. Girewteyî wazenê raya pêroyî, sazgehê keyeyanê girewteyan nê meseleyan ser o vindarê û avûkat, parlamenterê ke Komîsyonê Edaletî yê Meclîsî de yê şêrê înan zîyaret bikerê.”
Vengdayîşê wayîrvejîyayîşî
Hesen Şîmşekî waşt ke komel girewteyan rê wayîr vejîya û wina vengda: “Ma wazenê parlameneterê ma girewteyan rê wayîr vejîyê û Meclîs de bîyarê ziwan û avûkatî şêrê pêvînayîşê înan.”
‘Bi hewayêko keyfî veradayîşan taloq kenê’
Birayê girewte Firat Bîlenî (26) ke 2ê gulana 2017î de ame girewtene û nika Hepisxaneyê Ewlekarîya Berze yê Hûmara 2. yê Amedî de yeno girewtene, Ahmet Bîlenî zî da zanayene ke ganî birayê ey êlula 2024î de biameyêne veradayene û wina vat: “Bi manayê cezaya ey a hucreyî est a, veradayîşê ey 6 aşman ame taloqkerdene. Dima ke 6 aşmî ey pir bîyê, mudirê hepisxaneyî û sergardîyanî vengdayo ey û vato ke, ‘ti nêeşkenê tîya ra vejîyê.’ Demo ke birayê mi sebebê ci perseno, bêyî ke sebebê ci ey ra vajî, bi hewayêko keyfî bi manayî ‘rewşêka başe de nîyo’ veradayîşê ey reyna seba 6 aşman yeno taloqkerdene. Vanê şima kewtê grevê vêşanîye û kewtê hucre. Nirayê mi zî vano, ‘xora şima nê semedî ra di reyî taloq kerd, na rey şima do çi semedî ra taloq bikerî?.’ Ê ey ra vanê, ‘Şima vejîyê teber beno ke şima dekewê sucan mîyan, nê semedî ra şima nêeşkenê vejîyê’.”
