Verfeka DEM Partî Ayşegul Dogane derheqê kombîyayîşê Heyetê Rayberdişê Merkezî de vat ke ganî meclîs berpirsîyarî bigîro xo ser û dest bi viraştişê çarçewaya qanûnî bikero û wina vat: “Ganî şertê birêz Ocalanî goreyê prosesî bêrê başkerdene û birêz Ocalan bieşko heme beşanê komelî reyde pêvînayîşan bikero.”
Verfeka DEM Partî Ayşegul Dogane Merkezê Pêroyî yê partîya xo de derheqê kombîyayîşê Heyetê Rayberdişê Merkezî de eşkerayî da. Ayşegul Dogane ard ziwan ke înan kombîyayîşê Heyetê Rayberdişê Merkezî yê DEM Partî de serê zaf babetan de erjnayîş kerdo.
Ayşegul Dogane bale ante çalakîya mamostayanê wendegehê taybetan ser ke seba waştişê înan bêrê caardene Anqara de yê û grevê veşanîye dabi destpêkerdene û waşt ke waştişê mamostayan bêrê caardene. Ayşegul Dogane dîyar kerd ke înan kombîyayîşê Heyetê Rayberdişê Merkezî de serê prosesê Aştîye û Komelê Demokratîkî zî erjnayîşî kerdê û vat ke heyetê înan xebatanê xo domneno: “Seba ke proses vindarnayîş ra vejîyo, ganî proses bi qanûnan bêro garantîkerdene û proses bi viraştişê qanûnan dest pê bikero. Heyetê ma yê Îmrali partîyanê sîyasîyan û serekê meclisî Numan Kurtulmuşî reyde pêvînayîş kerd. Pêvînayîşê heyetê ma do bidê domnayene. Pêvînayîşan de serê çarçewaya qanûnî de nîqaş û erjanayîşî ameyî kerdene. Ganî verê ke meclîs bikewo tehtîl, prosesê viraştena qanûnan dest pê bikero.
Pêvînayîşê heyetê ma û Numan Kurtulmuşî zî serê na babete bî
Numan Kurtulmuşî zî pêvînayîş de vato ke o zî hêvî keno verê ke meclîs bikewo tehtîl qanûnî bêrê viraştene. La berpîrsîyarîya Serekê Meclisî zî esta. Ganî çi bikewo serê milê înan, bîyarê ca. Ganî prosesê viraştişê qanûnan seba babeta cîyayan nêro taloqkerdene. taloqkerdene prosesê vebalêko pîl o. Na kewena serê milê ma pêroyan, seba aştîyêka mende gani nika ra qanûnê demkî yê prosesî meclis de bêro viraştene. Nê rojevî ra leztêr rojevêka bîne çîn a. Seba aye zî ganî kes maneyan nêgêro. Ganî nê firsendê tarîxî nêro taloqkerdene. Seba aye zî ganî hedefê ma o bo ke çarçewaya qanûnî aşma temmuze de bêro rojevê meclisî.”
‘Ganî meclîs zî berpîrsîyarîya xo ya tarîxî bigîro xo ser’
Ayşegul Dogane dîyar kerd ke Heyetê Rayberdişê Merkezî yê DEM Partî seba ke çarçewaya qanûnî bivejîyo planê çalakîyan zî kena û wina domna: “Nê rojevî ra teber rojevêka leztêr çin a. Babeta ke bê viraştena qanûnan bêrê caardene zî nînê caardene. Girewteyê sîyasî yê derheqê înan de qerarê Mehkemeya Heqanê Merdiman a Ewropa estê zî nêyenê veradayene. Seba aye ganî no proses tena serê milê partîyêke de nêbo û heme kesî berpîrsîyarî bigîrê. Ganî meclîs zî berpîrsîyarîya xo ya tarîxî bigîro xo ser. Rojê ameyoxan de hem pêvînayîşê heyetê ma yê Îmralîyî do bibê hem zî yê ma partîyanê sîyasîyan û dezgeyanê komelê sivîlî reyde do bibê.”
‘Ganî şertê birêz Ocalanî goreyê prosesî bêrê başkerdene’
Ayşegul Dogane va ke seba averşîyayîşê prosesî ganî şertê Rayberê Şarê Kurdî Abdullah Ocalanî bêrê başkerdene û nê çîyî ardî ziwan: “Çira destê înanê ke vera prosesî de yê xurt kenê? Hema zî persê seba pêvînayîşê Îmralîyî bêcewab manenê. Ganî heme beşê komelî bieşkê birêz Ocalanî reyde pêvînayîşan bikerê. Ganî şertê birêz Ocalanî goreyê prosesî bêrê başkerdene û birêz Ocalan bieşko heme beşanê komelî reyde pêvînayîşan bikero.”
‘Ma do 20ê Îlone de kongre virazê’
Ayşegul Dogane derheqê rojevê kongre de zî dîyar kerd ke kongreya înan do 20ê Îlone de bêra kerdene û nê erjanayîşî kerdî: “Komîsyonê ma amadekarîyanê xo kenê. Ma do bi hawayêko tewr xurt şêrê kongre. Komîsyonê ma yê eleqedarî û yê nîzamnameyî amadekarîyanê xo kenê. Ma do konferansan virazê. Ê konferansî seba amadekarîya kongre yê. Ma do xo newe bikerê. Ma do tarîxê xo yê têkoşînî reyna bikerê erjan û têkoşînê xo xurtêr bikerê. Partîya ma do biba awankarê Aştî û Komelê Demokratîkî. Heta nika ma çi pawit, ma do bi hawayêko xurtêr bipawê. Ma wextê ke prosesê Aştî û Komelê Demokratîkî de şinê kongre. Ganî no proses tena DEM Partî rê nêro verdene û ma pîya têkoşîn bikerê.”
Peynîya qiseykerdişê xo de Ayşegul Dogane derheqê averşîyayîşê Rojhelatê Mîyanênî de va ke ê wazenê heme şer û pêkewtîşî biqedîyê û herême de aştî bêra. Ayşegul Dogane bale ante peymana mabênê Amerîka û Îranî ser û dîyar kerd ke hewcedarîya Rojhelatê Mîyanênî bi demokratîkbîyayîşî esta.
Ayşegul Dogane serê persê çapemenîye yê vurîyayîşê nameyê partî û hemserekan de zî dîyar kerd ke ê do konferansanê qezayan û şaristanan de na babete de qerar bigîrê.
