Serekwekîla Grûba DEM Partî Gulîstan Kılıç Koçyîgît vat ke serrgêra 27. ya Komployê Mîyanneteweyî de ganî her kes wayîrê vengdayîşê 27ê sibate vejîyo û vat: “Ganî raporo hempar, heqê heme netew û bawerîyan garantî bikero.”
Serekwekîla Grûba DEM Partî Gulîstan Kılıç Koçyîgît derheqê hedîseyanê ke rojev de yê meclîs de eşkerayî daye. Koçyîgît vat ke komployê mîyanneteweyî yê hemverê Rojava ke têduştîya şaran hedef girewtêne, bi mudaxeleyanê Rayberê Şarê Kurdî Abdullah Ocalanî ame vindarnayene û vengdayîşê 27ê sibate yê Ocalanî zî Komployê 15ê Sibate pûç kerd. Koçyîgît vat: “Wayîrvejîyayîşê aştî wezîfeyêka tarîxî ya. Ganî ma heme bi berpirsîyarîya Birêz Ocalanî ke girewta milanê xo ser o hemkarîye bikerê.”
‘Ganî raporo hempar heqê heme netew û bawerîyan garantî bikero’
Koçyîgît bale ante xebatanê Komîsyonê Meclîsî ser o û wina vat: “Kombîyayîşa peyêne de 2 akademîsyenan zî vat ke ganî meseleyê kurdan çarçewaya emnîyetî de nêro erjnayene. Ma sey DEM Partî vanê ganî raporo hempar ke do bêro hazirkerdene, zîhnîyetê çinhesibnayîşî ra dûrî bo, bi hewayêko ke heqê heme netew û bawerîyan garantî bikero, bêro hazirkerdene.”
‘Dewaya tacîzî ya meclîsî’
Koçyigit vera serbestveradayîşê kesanê ke dewaya tacîzê gedeyan ê meclîsî de ameyê muhakemekerdene reaksîyon mojna û vat: “Dadwerî girewteyî ke ameyêne muahkemekerdene, veradayî. Ma çend deqîqe ra ver eşnawit ke mesajanê WhatsApp’î ser o newe 3 kesî ameyî girewtene û hema ê bînan zî gêrenê. La dadwerî senî vana ‘delîl çin ê’ û înan serbest veradana.
‘No sîstem cinîyan nêpaweno’
Koçyîgît derheqê Guler Ozkanî ke hetê mêrdeyê xo ra ameybî kiştene qisey kerd û vat: “Rixmê heme zîyaretan zî Wezaretê Keye û dewlete ra Guler Ozkan nêameye pawitene. No sîstem cinîyan nêpaweno, kiştişê cinîyan teşwîq keno.”
‘Şar nêeşkeno debara xo bikero’
Koçyîgît aşma Remezanî heme misilmanan rê pîroz kerd û vat: “Rîyê sîyaseto şaş ê îqtîdarî ra şar nêeşkeno debara xo bikero. Nanêko pîde 25-35 lîreyî yo, şar do senî pîde biherîno?”
‘Wezîrê Edaletî ganî problemanê huqûqî ser o vindero’
Koçyîgît derheqê Wezîrê Edaletê yo newe Akîn Gurlekî de vat: “Hema newe dest bi kar kerdo û gama verêne vano, ‘ma do heqan asteng bikerê, pêvînayîşanê avûkatan ê muwekîlanê xo reyde do bêrê astengkerdene.’ Mesele na nîya, mesele o yo ke şertê ke girewteyî tede yenê girewtene, o yo. Ganî goreyê ruhê prosesê Aştî û Komelê Demokratîk gamê pozîtîfî seba girewteyanê sîyasî bêrê eştene. Astengkerdişê heqê pêvînayîşê avûkatan hemverê huqûqî yo.”
