Kurdîstan û Tirkîya de yewane bazarê fêkî û sewzîyan ke cinîyan ey îdare kerdêne, nika her ke şono keweno binê serdestîya camêrdan.
Qezaya Rêzanî ya Amedî, Bazarê Cuye yê Taxe ke Kurdîstan û Tirkîya de reya ewil bi destê cinîyan awan bibi, hetê camêrdan ra her hetî ra rengê ci ame bedilnayene.
Bazarê cinîyan o ke demê Hemşaredar Gultan Kişanak de serra 2013î de Taxa Bagcilar ya Rêzane de amebi akerdene, des serran ra pey bi mudaxaleyê qeyûmî, camêrdan dezgeyî akerdbî. Nê demanê peyênan de rengê bazarî bedilîya û hûmara bazarkaranê camêrdan yê cinîyan vîyarna. Hûmara bazarkaranê cinîyan 200 ra kewt bi 40 kesî.
Hem govendgêr a û hem zî bazarkarîye kena
Endama Grûba Govende ya Komela Kultur û Hunerî ya Dîcleyî Guler Denîz no 13 serrî yo Bazarê Cinîyan ê Taxe de fêkîyan roşena. Guler Denîz demê festîval û şayîyan de mîyanê xebatan de ca gêna û reyna seba ke debara xo bikera zî bazar de xebitîyena.
Guler Denîz her serê sibayî bi lez pîqaba xo wenîşena şona Halê Fêkî û Sewzîyan seba rotişî sewzîyan ana qada bazarî. Guler Denîz da zanayene ke destpêkê aye yê karê bazarkarî seba lazimtîyanê keyeyî bîyo û wina vat: “Perwerdeyê govende ra pey no 13 serrî yo ez tîya de xebitîyena. Ez û embazan xo ma hem govend gênê û hem zî ma yenê tîya de xebitîyenê. Ewil ma nêzanayêne ma zehmetî dîyîne la nika ma karê xo bi keyfweşî kenê. Ez saete çarê serê sibayî şona hale eşyayanê xo gêna û yena dezgeya xo akena. Heta ewro mi destê xo kesî rê nêakerdê. Mi bi keda destê xo ereba girewte. Nika ez keyeyê xo ra ewnîyena. Destê mi de platîn est o. Bi nê halê xo ez zî xebitîyena û no zî mojneno ke cinî biwaza eşkena heme karê xo bikera.”
Xwezîya xo rojanê destpêkî rê ana
Guler Denîz bale ant bedilîyayîşê bazarê cinîyan ser o û nê çîyî vatî: “Bazar de cinî est ê la her ke şono kêm benê. Demo ke heme cinî est bîyî, bazar hîna weş bi. Ma xwezîya xo bi ê rojan anê la çi heyf ke nika ti kamca ra ewnîyenî camêrdî est ê. Ê vengê xo zaf berz kenê ke vengê cinîyan bibirnê û wazenê ke bi camêrdîya xo cinîyan bazar ra biqewirnê la no yo ma tîya de yî. Tîya seba cinîyan îmkanêko baş o. Cinî eşkenê linganê xo ser o vinderê. La qeyûm tîya herimna, na qade cinîyan rê teng kerde. Ez dezge de xebitîyena la mi panc dezgeyî kîra kerdê seba ke camêrdî heme ca nêgîrî. Ma do xover bidê.”
