Goristanê PKK’yîjan o ke Koyê Herekol de yo hetê leşkeranê artêşê tirk ra ameyo rijnayene û herinda mezelanê 63 endamanê PKK’yîjan nêasena.
Goristanê Herekol yanî bi pênasekerdişê PKK’yî Şehîdgehê Ezîma û Şehîd Resul Goyî hetê PKK’yî ra serra 2014î de Herêma Çemê Karî yê qezaya Berwarîya Sêrtî amebi awankerdene û mezelê 63 endamanê PKK’yî yê ke tarîxanê cîya cîyayan de cuya xo vîndî kerda, tede est bîyê. La aşma teşrîna peyêne ya 2017î de hetê leşkeranê tirk ra ame rijnayene. Goreyê agahîyanê ke çimeyanê herême dayê, demê 2017î de koçerê herême şîyê deşte, leşkerê artêşê tirk makîneyanê karî reyde kewtê Herêma Çemê Karî û dest bi rijnayîşê goristanê Herêma Bersorî kerdo.
Herinda mezelan zî nêasena
Keso ke rijnayîşî ra ver tîya nêdîbo, nêzano ke tîya de goristan est o. Seba ke tu herindê mezelanê 63 PKK’yîjan nika nêasenê û goristan sey deştêk aseno. Reyna tu herindê mescîd û mêmanxaneyê ke ameyê viraştene, ê zî nêasenê.
Mezelê PKK’yîjan ça de yê?
Nê rijnayîşî ra pey persê ‘gorê PKK’yîjan ça de yê’ vejîyeno orte. Goreyê çimeyanê herême yan mezelî heme eyn ca de ameyê definkerdene yan zî bi kepçeyan bar kerdê kamyonan û ê berdê cayêko bîn.
