Ziwayîya ke rîyê kêmbîyayîşê varanî ra Wan de virazîyaya, golanê Arçak û Sixkeyî ke sey ‘Cinnetê milçikan’ ameyê namekerdene, înan ser o tesîr kerd.
Krîzê îklîmî, awdayîşo zaf, polîtîkayê citkarîye yê şaşî û kêmbîyayîşê varanî bîyê sebebê ziwabîyayîş û kêmbîyayîşê awa golan. Gola Arçak ke 30 kîlometreyî Wan ra dûrî ya û Gola Sixkeyî ya ke merkezê şaristanî de ya, awa înan kêm bîya. Gola Arçak ke golanê tewr avzel a şaristanî ra yew a û her serre hetê desan gêrayoxanê herême û mîyanneteweyîyan ra yena zîyaretkerdene, awa ci zaf kêm bîya.
Goreyê xebera Ajansê MA’yî asta awa Gola Arçak ke bi xususî wisar û hamnanî mêmanperwerîya milçikanê koçberena kena, bi hewayêko zelal kêm bîya û zaf cayê ci ziwa bîyê. Kewtişê asta awe ya serrane, cugeyê xoza yê ekosîstemê gole tehdît keno. Gola ke cugeyê nêzdîyê 230 tewiranê milçikanê Tirkîya ya, rîyê kêmbîyayîşê awe ra hûmara milçikan kena tehluke. Bircê Muşahedeyî yê Filamingo yê ke dormereyê gole de ameyê viraştene, nika dûrî qeraxê gole de yê.
Golêka bîne ke bena qurbanê lêminîya cugeyî, polîtîkayanê citkarîye yê şaşan û germbîyayîşê gerdûnî Gola Sixkeyî ya ke mabênê qezayanê Tûşba û Rîya Armûşî yê Wanî de ya. Gola Sixkeyî ke mêmanperwerîya xeylê tewiranê gandaran kena, nika rîyê kêmbîyayîşê awe ra tehdîtê ziwabîyayîşî reyde rî bi rî ya.
