Hemserekê YEW-KURD’î Hakki Boltan bale ant muhîmîya Fuarê Kitaban ê Amedî yo 9. û vat: “Amancê ma o yo ke nuştoxanê xo yê kurdan ray pêroyî ya kurd û Kurdîstanî rê bidê naskerdene.”
Emserr do Fuarê Kitaban ê Amedî yo 9. bêro kerdene. Fuar do mabênê 18 û 26ê teşrîna verêne de Merkezê Kongre û Fuarî yê Mezopotamya yo Mîyanneteweyî yê Amed de bêro kerdene. Yewîya Weşanxaneyanê Kurd(YEW-KURD), Şaredarîya Amedî ya Şaristanê Girdî, Walîtîya Şaristanî, Odaya Bazirganî û Meslekî yê Amedî (DTSO) û TUYAP bi hemkarî do organîzasyonê fuarî bikerê. Nêzdîyê 30 weşanxaneyê kurdî û sazgehê ziwan û kulturê kurdkî zî do fuar de ca bigîrê û standanê xo akerê. Do fuar bi merasîmêk bêro akerdene. Do 9 rojî dewam bikero. Hemserekê YEW-KURD’î û wayîrê Weşanxaneyê Aramî Hakki Boltan derheqê Fuarî de Ajansê ma rê qisey kerd.
‘Ma wazenê nuştoxanê xo bidê şinasnayene’
Hemserekê YEW-KURD’î Hakki Boltanî dîyar kerd ke xebata fuarê kitaban raya pêroyî, Kurdîstan û Tirkîya de zaf stratejîk û muhîm a û wina vat: “Her dewlete bi sîyasetê xo yê kitaban est o. No sîyaset tena seba rotiş û nuştoxan o. Seba ziwan û kulturî karêko cewherî est o. No fuarê kitaban seba sîyasetmedar, sazgeh û dezgehanê kulturî xebatêka sereke ya. Amancê ma o yo ke ma wendişê kitabanê Kurdkî, wendişê seba zanyarî bi fuaran aver berê. Kurdîstan de zî pêşengîya ci Komela Yewîya Weşangeranê Kurdan kena. Amancê ma o yo ke nuştoxanê xo yê kurdan ray pêroyî ya kurd û Kurdîstanî rê bidê naskerdene. Heme weşanxaneyê kurdî do standan de îmzayanê kitaban nuştoxanê xo reyde bikerê.”
‘Amancê hêrişan Kurdkî yo’
Hakki Boltan bale ant hêrişanê vera kitabanê Kurdkî yê fuaran ser o û nê çîyî vatî: “Çîyo tewr bi tehluke fuaran de hêrişê hukmat û dewlete yo. Mîyanê dewlete de polîtîkayêka yewhetî est ba, helwêstê fuar ser o zî helwêstê hêrişî beno. Ma ser o hêrişî zaf ê. Amancê nê hêrişan seba kitabanê Kurdkîyan o ke raya pêroyî rê pêşengtî keno. Kurdî wayîrê tarîxî yê. Tarîxê înan 10, 12 hezar serrî yo. Nê semedî ra îqtîdar hêrişê weşanger û kitabanê Kurdkîyan keno.”
‘Gedeyan rê kitabanê Kurdkîyan pêşnîyaz bikerê’
Hakki Boltan îfade kerd ke fuar de emserr do nêzdîyê 30 weşanxaneyê kurdî do ca bigîrê û qiseykerdişê xo wina qedîna: “Amanc û waştişê ma o yo ke ma bi dsîplînêk û amadekarîyêka xurt wendoxanê xo reyde bêrê têhet. Bi hewayêko serkewte encam bigîrê. Ma emserr xeylê hêvîdar ê. Hem seba xebatanê ke ameyê kerdene hem zî ê ke do bêrê kerdene. Ma pawenê ke beşdarîyêka xurt biba. Gedeyê kurdî do bêrê fuar û kitabanê Kurdkîyan bivînê. Do hîna zaf ziwanê xo nas bikerê. Seba kurdan no fuar zaf muhîm o. Vengdayîşê ma o yo ke kesê ke seba kitabanê Kurdkîyan yenê wa teşwîq zî bikerê. Wa haydar bibê demo ke yenê fuar wa gedeyanê xo rê kitabanê Kurdkîyan pêşnîyaz bikerê. Ma par ra hîna zaf hêvîdar ê.”
