Endamê MYK’yî yê ÎHD’yî Hakki Demîr derheqê proses û polîtîkayanê ziwanî ser o û ewro ra pey ganî senî bibo, nê babetan ser o qisey kerd û wina vat: “Sey her kesî heqê ma zî est ê, bêrê ma pêro pîya bixebitî û heqanê xo bigîrê.”
Vengdayîşê 27ê Sibate ke Rayberê Şarê Kurdî Abdullah Ocalanî kerd, ey ra pey hem partîyê sîyasî hem xebatkarê komelan û hem zî temsîlakarê rêxistinan nê mesajî erjnenê û proseso newe ser o xebitîyenî ke do no proses bireso encam.
Endamê Heyetê Rayberdişî yê Merkezî yê Komela Heqanê Merdiman ya Îzmîrî Hakki Demîr ajansê ma (AW) rê derheqê prosesê çareserî de qisey kerd.
‘Kes şima nêtepişeno, bêrê bixebitî’
Hakki Demîrî dîyar kerd ke heto ke wazeno çekan rono, vano wa her kes huzur mîyan de bo û kam naye wazeno wa bêro bixebitîyo û wina vat: “Wa kes kesî nêkişo, maya kesî nêberma. Însanê pêro qandê rindeye bixebitîyo. Heta nika ma vatêne ma ziwanê xo de biwanê, ziwanê xo de qalî bikê, mekteb biwanê, kitabî binusê. Dewlet vatêne tîya de pêrodayîş est o, teror est o. Abdulla Ocalan mesajê xo de vat wa no pêrodayîş biqedîyo, qadê merdiman, însanetey de wa dewlete rehet bixebita. Ma êdî eşkenê hîna rehet vajî heqanê ma bidê. Ê ke çekan ronenê vanê wa însanî weş bê, wa însanî hûzir mîyan de bê. Eke şima zî wina vanê bêrê bixebitî, ma zî do şima reyde bixebitî.
Tirkîya de wa demokrasî bêro, wa kes kesî derdest nêkero, kes kesî nêerzo hepis. Ma pêro pîya qandê naye bixebitî. Cayo ke sîlah erzîyena însan nêeşkeno rehet qisey biko. Ma nika hîna rehet û xoser qisey kenê. Tayê însanî vanî ke ‘nê kurdî çira wina kenê, wa AKP reyde Tayyîp Erdogan reyde bêrê têhet.’ Ma zî vanî ke kes şima nêtepişeno, bêrê bixebitî. Qadê demokrasî, qadê merdiman, qadê winasîn î ke merdim eşkeno xoser qalî biko. Bixebitî kes şima nêtepişeno.
‘Vengdayîşê 27ê Sibate ra pey ma hîna rehet qal kenê’
Wa heqê her kesî hende pê bê. Wa kes kesî apey nêanco. Ma seba ney xebitîyenê. Ma do hîna vêş û hîna rind bixebitî, kes destanê ma nêtepişeno. Vengdayîşê Abdullah Ocalanî yê 27ê Sibate ra pey ziwanê ma hîna bi derg, ma hîna rehet şênê bixebitî. Wa kes nêvajo nê kurdê ma roşenê. Wexto ke bombayî erzîyayî înan ser o, wexto ke qeyûm tayînê şaredarîyanê înan kerd kesî teber nêkerd. Wexto ke Roboskî de F16’yî ke gedeyî ke hema şîyêne mekteb kiştî, F16’yî ke girêdayeyê Genel Kurmay ê. Ganî her kes bivejeyêne teber, bivavtêne no gure senî beno? Êdî ma vanî ke seba demokrasî,seba heqanê merdiman bixebitî.”
‘Ma înan ra bawer nîyê, ma xo ra bawer ê’
Hakki Demîr bale ant polîtîkayanê ziwanî ser o ke bi serran o yeno qedexekerdene û riyê nê polîtîkayan ra nêzanê ziwanê xo de qisey bikerê û behsê çiyî ke ganî bêrê kerdene kerd û vat: “Verameyîş weş o. Ganî ma hîna zaf bixebitî. Vanî ke şima senî bawerîya AKP û MHP’yî benê, ma înan ra bawer nîyê, ma xo ra bawer ê. Beno ke ma ganî ziwanê xo ser o hîna zaf bixebitî. Ma ziwanê xo de nêşinê rehet qal bikê. Qebahatê nê ma de nîyo. Na dewlete 70 serrî yo ma nê ziwanî ra men kerdo, nêverdayo ma ziwanê xo bimusê. Rojêk mi radyo akerde, maya mi vat ke ‘Yaw Heqî mi bizanayêne na radyo de çi qisey benê, ez ewro bimerdêne.’ No ziwanê ma darekin o. Çira cayê nê ziwanê ma çin o, ma nêzanê na radyo de çi qalî benê? Dewlete wina kerd ke ma ziwanê xo nêmusê. Êdî dewlete nêeşkena vaja nê ‘bolucu, terorîst ê.’ Ma xo rê ziwanê xo bimusê. Wa ziwanê ma mekteban de bêro qiseykerdene. Wa êdî her kes şêro mekteban û ziwanê xo de dersan vajo. Wa nêvajo ma ziwanê dayîke de perwerde wazenê. Nîka no est o, ewil ma ziwanê xo weş bimusê dima ma ziwanê dayîke de perwerde biwazê. Eke ma şîyê seba gedeyanê xo ders waşt û înan nêda ma pêro bêrê têhet û ma heqê xo bigîrê.
Ma vêrgî (bac) danê na dewlete. Wezaretê Perwerdeyî yê Neteweyî ganî xizmetê mi zî biko, heqê ma zî est o. Wa ziwanê ma de kursan akero, dersan bido, sey her kesî heqê ma zî est o. Dewlete se kena wa bika, ma seba vurîyayîşî bixebitî. Êdî dinya de heme ca de her kes zano Tirkîya de yew meseleyê kurdan est o. Ma qandê naye bixebitî. Ma se bikerî ke na mesela werte ra hewanê, ma pîya qandê naye bixebitî, kes destanê ma nêtepişeno.”
