Vervatoxa Meclîsê Cinîyan ê DEM Partî Halîde Turkoglu mesajê Rayberê PKK’î Abdullah Ocalan selam kerdî û vat: ‘’Ganî pêvînayîşî çarçewa qanûnî de bêrê kerdene. Rayîrê ney zî her hetî ra wedaritişê tecrîdî yo.’’
Vervatoxa Meclîsê Cinîyan ê DEM Partî Halîde Turkoglu merkezê partîya xo de kombîyayîşê çapemenîye kerd û serebûtê rojdemî ercnayî.
Halîde Turkoglu hêrişê Dewleta Tirke yê vera Rojawanî ercnayî û dîyar kerd ke îqtîdaro sîyasî bi destê hêzanê xo yê paramîlîteran SMO’yî Rojawan dano bombayan ver.
Halîde vat: ‘’Hêrişê vera Tişrînî hêrişê pêroyê Rojawanî yê. Şarê Rojawanî xo ver dano û keno ke awbendê xo bipawo. Ma îqtîdarî ra persenê; şima şarê Rojawanî ra çi wazenê? ‘’
Halîde derheqê nîqaşanê serê çareserîya meseleya kurdan de zî wina vat: ‘’Şert û mercê haştîye dîyar ê. Birêz Ocalan 26 serrî yo tecrîdkerde yo. La seba haştîye xîret keno. Pespektîfê Birêz Ocalanî seba çareserîye girîng ê. Birêz Ocalano ke vera sîyasetê şerî, xerîteya haştîya rûmetêne pêşkêş kerde, ewro hema zî tecrîdkerde yo. La ganî nê pêvînayîşî çarçeweyêka qanûnîye de bêrê kerdene. Rayîrê ney zî her hetî ra wedaritişê tecrîdî yo. Ganî şert û mercî bêrê afernayene, gama haştîye ya verêne bierzîya. No bi têkoşînê ma yê cinîyan beno. Çunke şer de bedelanê tewr giranan cinîyî danê. Ma venga pêro cinîyan danê ke bêrê ma dormeyê haştîya rûmetêne de kom bibê, cuyêka azade û têdûşte pîya awan bikerê.’’
