Endama Komela Xoza yê Munzurî Hatun Esene seba wayîrvejîyayîşê xozaya Dêrsimî û heme cayan veng da va: “Dewlete 38î de Welatê ma kerd tal, nêvinderte 94î de ancîna welatê ma kerd tal. Şarê ma sare ronêna û xozaya xo ra welatê xo ra wayîr vejîya û vejîno.”
Endama Komela Xoza yê Munzurî Hatun Esene Ajansê ma rê qisey kerd. Hatun Esene seba nêzdîbiyayîşê dewleta tirke yê vera herdê Dêrsimî vana ke “Dewleta Tirke hetanû nika, serê hardê dewreşî de teyna tengîye arde, 94î ra tepîya keyanê ma, koyanê ma veşnena. Pê destê şîrketan binê hardî de zernan ra gêrenê, bendanê awe virazenê nê pêro pîya Xozaya Dêrsimî kenê xirabin.”
‘Welatî ra durî kewtene merdena însanî ya’
Hatun Esene seba wayîrvejîyayîşê xoza veng da û va: “Dewlete 38î de Welatê ma kerd tal, nê vinderte 94î de ancîna welatê ma kerd tal. Hetanû nika şarê Dêrsimî zaf hêşîrîye, barkerdenê, kîştene, tewer kerdene dîye reyna kî destê xo welatê xo ra nêkerd û wayîr vejîya. Welatî ra durî kewtene merdena însanîya. însanê ma yê ke 93-94îne de şî înan ra tayîne 37-38 dîbî. Înan ra kamilanê dewa ma ju kilame vanêne:
‘Ma kesî ra zern sêm nêwazenîme,
Ma kesî ra qonax nêwazenîme,
Dewanê ma peyser bidêne ma,
Qulikê ma ma rê bes ê’
Nika rind famkena ke însano ke hardê xo ra birîya ra, koyanê xo ra şî cayê durî, merdene însanî ya. Ma nêwazenîme kes welatê xo ra durî bikuyo.
Ma talanê xozayî nêwazenîme. Qomê Dêrsimî çiqas teberde beno bibo reyna kî çimê xo serê Dêrsimî de bî welatê xo ser de bî.”
Teyna seba xozaya Dêrsimî nê kotî de yew tengîye bibo, kotî de talanê xozayî bibo sey Komela Munzurî ci rê wayîr vejîyena û reaksîyonê xo nîşan dana. No derheq de Hatun Esene wina vana: “Kam ke çi tenge de ro ma paştî danîme ci. Çi destê ma ra bêro ma tepya nêdanîme.”
‘Ma cayê şima kerd teng heqa xo ma ro helal bikerê’
Têkilîyê şarê Dêrsimî û Xozaya Dêrsimî, îtiqatê Dêrsimî zaf xorî ya, Hatun Esene wina dîyar kena: ”Şarê ma vaxtê verênî de key ke şîyêne wore veng dêne verî heqê teyr û turî, milawûn û perperikan waştêne. Vatêne ‘ma ameyme dîyarê şima, bîme meymanê şima, ma cayê şima kerd teng heqa xo ma ro helal bikerê’ wina bî. Şarê ma na raye ra şono ê sekenê? Kotî ke koyê ma, awê ma, çemê ma estê kûnê ci kenê xirabe.”
‘94î de ma kerdîme tewer, nika ma ra çi wazenê?’
Hatun Esene peynîya qiseykerdişê xo wina ana: “Ma gêrê bême pêser û jîyar û dîyaranê xo ra wayîr vejîme. Veşnayena banan û binê hardî kinitene zê jubinîya. 94î de ma kerdîme tewer, nika ma ra çi wazenê? Şima ke welatê xo ra wayîr mevejîyê, ancîna şîyayene, barkerdene ma rê yena. Ma gerê vêrnîya naye de vindime. Zereyê ma rehet nîyo. Ma nêeşkenîme vindime. Ancax ke haştîye û rindîye bêro welatê ma, binê hardî û serê hardî gorê rizatîya qomê ma bibo o wext ma benîme rind.”
