Nuştox û perwerdekar Haydar Diljenî, nuşteyanê xo yê 40 serran ê derheqê ziwan, kultur û sîyasetî de kitabê xo yê neweyî ‘Raywanîya Çekuyanê Mi’ de ardê pêser.
Kitabê nuştox û perwerdekar Haydar Diljenî yo newe, bi nameyê “Raywanîya Çekuyanê Mi”, hetê Weşanxaneyê Aryenî ra weşanîya. Kitabo ke 344 rîpelan ra yeno pê, nuşteyanê Diljenî yê 40 serran (1985-2025) ê derheqê perwerde, ziwan, kultur û sîyasetî de ano yewca.
Haydar Diljenî derheqê kitabê xo de va ke amancê ey bi weşanayîşê nê kitabî o yo ke, cuye, fikir, tecrube û îfadeyanê ziwanî yo ke xebatanê bi serran ê seba perwerde, ziwan û edebîyatê Kurdkî (Zazakî) de ameyê kerdene, parekerdişê înan o. Diljenî îfade kerd ke o hêzê çekuyan ra bawer keno û vat, “Ciwîyayîşê ziwanî, ciwîyayîşê şarî yo.”
Nê nuşteyî ke 40 serran de ameyê nuştene, verê cû kovar û rojnameyanê sey Kovara Vateyî, Berbang, Azadiya Welat, Armanc, Ozgur Politika, Hiwa, Avaşin û Çira de weşanîyayê.
Haydar Diljen o ke 1983î de şîyo Swêd, xebatanê xo yê ziwan û kulturî uca de domneno. Mabênê serranê 1996-2005î de endamê redaksîyonê Kovara Vateyî bîyo û hema zî endamê Grûba Xebate ya Vateyî de ca gêno. Heta nika bi kurmancî û kirmanckî (zazakî) 14 kitabê ey ameyê çapkerdene.
Weşanxaneyê Aryenî zî derheqê kitabî de wina vato: “Ma zey Weşanê Aryenî zaf zerrîweş ê ke ma dest bi neşirkerdişê kitabanê kirmanckî-zazakî zî kerdo.”
