Fermandarê HSD’yî Sîpan Hemoyî dîyar kerd ke peymana ke îdareyê Şamî reyde virazîyaye, amancê aye Rojawanê Kurdîstanê de garantîkerdişê destkewteyan o û proses do game bi game aver şêro û vernîya naskerdişê kurdan ê sîyasî de rayîr akero.
‘Peymane bingeyê naskerdişê estbîyayîşê kurdan virazena’
Hemoyî vat: “Bi fedakardîya girse ke 14 serran de ameye dayene Roajawan resayo na merhala û na sey peymane eşkera bîye. Na, bingeyê ey virazena ke estbîyayîşê sîyasî yê kurdan bêro naskerdene. Na peymane her çî nîya. Ma na peymane sey destpêkerdişê têkoşînêko ke seba girewtişê bingeyê sîyasî ke seba kurdan yeno dayene, gamêka bingeyin û sey zeminêk ke kurdî eşkenê nasnameyê xo yê sîyasî garantî bikerê, vînenê.”
‘Dorpêçê Kobanê do nêzdî de bêro wedaritene’
Hemoyî vat ke goreyê peymane, proses do çend merhaleyan de bêro dewamkerdene: Verê adirbestî, dima têmîyankerdişê hêzanê eskerî, dima ronayîşê hêzanê emnîyetê mîyanênî û peynî de entegrasyona sazgeh û rêxistinanê Rojawanî. Hemoyî vat ke o bawer keno ke dorpêçê Kobanê do çarçeweya peymane de nêzdî de bêro wedaritene.
‘Dewleta tirke mîyanê prosesî de ya’
Hemoyî vat ke dewleta tirke tena nê prosesî de ney destpêkerdişê Şorişê Rojawanî ra nat bi hewayêko dişmenane est a. Şêxmeqsûd de û heme çeleyî de rolê dewleta tirke eşkera ame dîyene. Hemoyî vat: “Dewleta tirke tena daraxê piştîdayîşî de ney, pozîsyonêk de ya ke fiîlen prosesî rayra bena.”
‘Vera qirkerdişê girsî apey game erzîyaye’
Reqa, Dêrazor û Tebqe ra derheqê vejîyayîşê HSD’yî de Hemoyî vat: “Komployo plankerde kewt meriyet. Amanc destpêkerdişê şerêko newe yê mabênê kurd û ereban bî ke bi serran dewam bikero. Ma seba vernîgirewtişê qirkerdişê muhtemelî apey game eşte. Nê qerarî rexneyê girsî ardî.” Hemoyî vat ke la ewro Kurdîstanê Rojawanî de destkewteyo zaf muhîm awan bî û nasnameyê sîyasî yê kurdan warê mîyanneteweyî de yeno qebulkerdene.
‘Xoverdayîşê Rojawanî rûmet û şeref bî’
Hemoyî xoverdayîşê Rojawanî û wirzayîşê yewîye yê şarê kurdî nirxna û vat: “Wirzayîşê yewîye yê şarê kurdî raştî yo; tena qisey nîyo pênaseyê teorîk o. Na raştîyêka ciwîyaye ya. Eke ewro qala destkewtiş û serkewtişî kenê, no seba şarê kurdî û wirzayîşê ey yo.”
