Derheqê Hemşaredaranê Şaredarîya Akdenîzî Hoşyar Sariyildiz û Nurîye Aslan de qerarê tepiştişî ame dayene. Şaro ke vera dadgeh de paweno reaksîyon nîşan da û beyanatî de wina vajîya ‘Ma nê qerarî qebul nêkenê’.
Mersîn de 10ê Çeleyî de operasyonê keyeyan de Hemşaredarê Şaredarîya Akdenîzî Hoşyar Sariyildiz û Nurîye Aslan û endamê Meclîsê Şaredarîye Ozgur Çaglar, Neslîhan Oruç, Yakup Daniş û Hîkmet Bakirhan hakimîye ver de îfadeyê înan ameyî girewtene. Dozgerî bi şahidê nimite waşt ke Hemşaredarî Hoşyar Sariyildiz û Nurîye Aslan û endamê Meclîsê Şaredarîye Ozgur Çaglar seba “endametîya rêxistine”, “dayîşê destegê malî yê rêxistine”, “propagandaya rêxistine” û “vera qanûnê 2911î” û endamê bînî zî seba “endametîya rêxistine” bêrê tepiştiş. Hakimîya Nobedarî ya dadgeha ceza ya pêardişî bi nê îddayan hemşaredarî Hoşyar Sariyildiz û Nurîye Aslan û endamê Meclîsê Şaredarîye Ozgur Çaglar, Hîkmet Bakirhan û Neslîhan Oruçî rê qerarê tepiştişî da û qeyûm eşt şaredarîye ser o. Endamê Meclîsê Şaredarîye Yakup Daniş bi kontrolê edlî ame veradayene. Şaro ke vera dadgeh de pawitêne qerarî rê reaksîyon nîşan da. Şarî bi sloganî “Em ê bi berxwedanê bi ser bikevin (Ma do bi xoverdayîşî ser bikewê)” beyanatê çapemenîye da.
‘Qerarî verê cû ameyî dayene’
Hemserekê OHD’yî yê Şubeya Mersînî Îbrahîm Kaya va “Tarîx tekrar keno. Senî Edîp Solmaz ame qetilkerdiş, senî partîyî bi qeraranê bêhiqûqîyan ameyî padayene, ewro zî yewna qerar ameyo dayene. Embazê ma bi qeraranê bêhiqûqîyan ameyî tepiştiş. Qerarî verê cû ameyê dayene, yew tîyatro ame kaykerdiş. Her sloganî ke teber ra ameye dayene, ma rê moral bî.”
‘Ma nê qerarî qebul nêkenê’
Hemsereka DEM Partî ya Mersînî Bedrîye Kuş zî va “Embazê ma bi qerarêko sîyasî ameyî tepiştiş. Înan qet yew suc nêkerdo. Bi sedemanê viraşteyan ameyî tepiştiş. No şar do reyna cewan bido nê polîtîkayanê viraşteyan. Ganî no qeraro bêhiqûq bi lez bêro peysergirewtiş, ma nê qerarî qebul nêkenê. Ma paştî danê têkoşînê embazanê xo. AKP rejîmê qeyyûman o. Mirdî nêbenê. Her çîyê şaredarîyan hetkaranê xo rê pêşkêş kenê.”
