Hemserekê Rêxistina DEM Partî yê Colemêrgî Behçet Kanat derheqê hezaza serê raya Colemêrg û Wanî de virazîyabî ser dîyar kerd ke girewtişê rayîrî netîceyê polîtîkayanê cîyayî yê serê Colemêrgî yo.
Raya Colemêrg û Wanî semedê hezaz û kewtişê vewrêsî 11ê nîsane ra heta nika girewteya. Hîrê hewteyê serê hezazî ra derbas bîyê la hema zî rayîr seba şîyayîş û ameyîşî nêameya akerdene. Şarê herême mexdûr bîyo û dîyar kenê ke kes hewarê înan de nêameyo û naye bi polîtîkaya cîyayene girê danê. Şarê herême vera nê îhmalî, sazgehê dewlete û îqtîdarî ra bi hêrs û eciz ê.
Hemserekê Rêxistina DEM Partî yê Şaristanê Colemêrgî Behçet Kanat derheqê îhmalîya serê raya Colemêrgî de ajansê ma rê qisey kerd. 
‘Bi zanayiş çim û goşê xo ci rê girewtî’
Behçet Kanat dîyar kerd ke rijiyayîşê raya Colemêrgî her çend semedê varan û vewra zêde bo zî la sebebo verên tesîso ke uca de ameyo viraştene yo û wina vat: “Uca de çopêko zêde amebî komkerdene û o çop binê rayîrî de ame pêserardene. Seba gazê metanî yê ke binê herre de kombîyo û şilîya zêdeyî yê varanî, teqayîşêk virazîya û raye rijîyaya. Raporê ÇED’î verê destê înan de bîbî, la bi zanayîş çim û goşê xo girewt ê.”
‘Polîtîkayê cîyayîye serê Colemergî yê’
Behçet Kanat bale ante polîtîkayanê cîyayî yê serê Colemergî û qiseykerdişê xo wina dewam kerd: “Şima şorê raya Bolû yan zî Deryaya sîya, şima do bivînê ke cayê bi eynî berzî de tûnelê gird û pirdê modernî ameyê viraştene. La wexto ke babete bena Colemêrg goş û çimî yenê girewtene. No dano mojnayene ke badê weçînayîşî ra seba welatijanê Colemêrgî cezakerdiş o.”
‘Çareserî raya Berçelanî ya’
Behçet Kanat dîyar kerd ke raya alternatîfe Berçelan ra derbas bena û wina domna: “Serra 2006î de na raye amebî akerdene, na raye seba şîyayîşê Wanî xeylê nêzdêyêr a, la dima ra semedê varayîşê vewre zêdeyî raya ameya girewtene. Ewro teknîk resayo na aste ke merdim eşkeno tûnêlanê 15 kîlometreyî virazo. Eke nîyet bibo, no rayîr demêko kilm de eşkena bêro viraştene. La wazenê şarê Colemêrgî her tim zehmetîyan de bimano.”
‘Tena propaganda kenê’
Behçet Kanat dîmenê ke medya de sey “xebata rayîrî” yenê mojnayene teberê propaganda de çîyêk bîn nîyo û vat: “Nê makîneyanê ke şima vînenê, seba viraştişê raya milete nîyê. Na xebata fîrmayêka petrolî ya. Ma vengdayîşê îqtîdarî kenê; rayîrê Berçelanî yê ke heqê nê şarî ya, wa bêro akerdene.”
