Hemserekê OHD’yî yê Şubeyê Amedî Muhîttîn Muguçî derheqê şîyayîşê Îmraliyî yê Komîsyonî de dîyar kerd ke ganî êdî qanûnî bêrê bedilnayene, qanûnê demokratîkbîyayîşî bêrê amadekerdene û vat: “Şîyayîşê Îmraliyî yê Komîsyonî mojneno ke êdî muxatabê prosesî birêz Abdullah Ocalan o.”
Komîsyonê Demokrasî û Waûbirayî û Piştîdayîşê Mîllî roja 21 ê teşrîna peyêne de şîyayîşê Girawa Îmraliyî yê pêvînayîşê Rayberê Şarê Kurdî Abdullah Ocalan reyde, kom bi û kombîyayîşî de qerarê şîyayîşî Îmraliyî girewt. Heyetê Komîsyonî de Serekwekîla Grûba DEM Partî Gulîstan Kiliç Koçyîgît, Cagirê Serekê Pêroyî yê MHP’yî Fetî Yildiz û AKP ra Huseyîn Yayman ca girewt. Endamê Komîsyonî 24ê teşrîna peyêne de şîyê Îmrali û Rayberê Şarê Kurdî Abdullah Ocalan reyde pêvînayîş kerd. Hemserekê OHD’yî yê Şubeyê Amedî Muhîttîn Muguç derheqê pêvînayîşî Komîsyonî yê Rayberê Şarê Kurdî Abdullah Ocalanî reyde û heqê hêvî de ajansê ma rê qisey kerd.
‘Muxatab hetêk ra dewlet bo heto bînî ra zî birêz Abdullah Ocalan o’
Muhîttîn Muguçî dîyar kerd komîsyon bêçare mend ke Îmralîyî û vat: “No demêko derg o bi ke munaqeşe şîyayîşê Îmraliyî ser o est bi. Tewr peyên de ame vatene ke proses yew hetî ra rayra nêşono. Nê semedî ra komîsyon şî Îmrali. Şîyayîşê Îmraliyî xeylê muhîm o. Seba ke dewleta Tirkîya heta ewro Têgêrayîşê Azadîye bi hewayêko fermî muxatab nêgirewto. Şîyayîşê Îmraliyî mojneno ke nê prosesî de muxatab hetêkî ra dewlete ba, heto bîn ra zî birêz Abdullah Ocalan o. Dewlete bi fermî birêz Abdullah Ocalan nas kerd. Êdî ganî meclîs qanûnan virazo. Çunke karê komîsyonî viraştişê qanûnan nîyo. Ganî meclîs qanûnan virazo. Komîsyonî pêvînayîş kerd û dima ra zî do pêşnîyazan bido meclîsî.”
‘Do Komîsyon rapor amade bike’
Muhîttîn Muguç îfade kerd ke pêvînayîşê Komîsyonê Rayberê Şarê Kurdî Abdullah Ocalan reyde ganî komîsyon dest bi amadekarîya qanûnanê demokratîkbîyayîşî bikero û wina qisey kerd: “Ganî komîsyon raporî amade bikero. Rapor zî babetanê qiseykerdişanê Îmrali ser o do bêro amadekerdene. Nê raporî de zî seba çareserkerdişê meseleyê kurdî xerîtayêk bêra pêşnîyazkerdene. Şîyayîşê Îmraliyî çîyêko pîroz bo. Seba ke heme çî seba vindarnayîşê şerî yeno kerdene. Kesê ke vera şîyayîşê Îmraliyî reaksîyonan mojnenê û seba menfatanê xo têgêrenê. Ma zanê ke wexto ke cayêko tede merg est bo, zerrîya şarî zî hişk bena. Seba ke zerrîya şarî germ biba, ganî nasnameyê şarê kurd û tirk newe ra bêro pênasekerdene. Ganî êdî qanûnê entegrasyonî bêrê amadekerdene.”
‘Ganî heqê hêvî bêro ca’
Muhîttîn Muguç ard vîrî ke prosesî de çîyanê tewr muhîman ra yew zî heqê hêvî yo û qiseykerdişê xo wina qedîna: “Abdullah Ocalan nê prosesî de bi hewayêko azad senî têbîgêro? Heqê hêvî cewabê nê yo. Kesêk hepisxane de, binê tecrîdî de do senî bieşko seba aştî wezîfeyanê xo bîyaro ca? Seba ke birêz Abdullah Ocalan ro lû mîsyonê xo bîyaro ca ganî heqê hêvî bêro ca. Eke heqê hêvî bêro ca, do no proses hîna lez bireso amancê xo. Yeno vatene ke no proses goreyê huqûqî rayra şono, eke wina bo ganî heqê hêvî bêro ca. Seba ke heqê hêvî huqûqî yo.”
