Huseyîn Bag ke Hepisxaneyê Suluca yê Edene de yeno girewtene da zanayene ke hepisxane de xeylê heqê înan yenê binpaykerdene û dîyar kerd ke kitabê ke nameyê kurd û Kurdîstanî tede vîyareno, ê kitaban nêdanê înan.
Hepisxaneyanê Tirkîya û vakurê Kurdîstanî zilm û binpaykerdişê heqan dewam kenê û her ke şono hîna vêşî benê. Nê hepisxaneyan ra yew zî Hepisxaneyê Ewleyîya Berze yê Suluca yê Edeneyî yo Hûmara 1. Girewte Huseyîn Bag ke 10 serrî yo girewte yo, roja şemî bi telefonî keyeyê xo reyde qisey kerd û binpaykerdişê heqan ê hepisxaneyî keyeyê xo reyde pare kerdê.
‘DAÎŞ, edlî û FETO’yîjan reyde yenê girewtene’
Girewte Huseyîn Bagî dîyar kerd ke odayê înan û girewteyê bînî eyn korîdor de yê û wina vat: “Ma awanîyêka hîrê qatine de manenê. Qatêkî de ma, qatêkî de DAÎŞ’îyijî, qatê binê înan de zî FETO’yijî manenê. Heme korîdorê ma wina kerdê. Yan zî ma DAÎŞ, edlî û FETO’yijan reyde eyn ca de tepişenê. Nêverdanê ke odayê ma têhet bibê. Demo ke ma sebebê ci persenê zî ma ra vanê ‘Polîtîkaya ma ya hepisxaneyî wina ya. Eke şima bêrê têhet şima do çalakîyan bikerê.’ Nê çîyan sey baxane mojnenê.”
Rixmo ke kitabî qedexeyê nêyî zî nêdanê înan
Huseyîn Bagî da zanayene ke kitabê ke nameyê kurd û Kurdîstanî tede vîyareno, nêdanê înan û wina dewam kerd: “Xeylê hepisxaneyan de nê kitaban danê la nê hepisxaneyî de nêdanê. Gelekî qedexeyî est ê. Ne kitabî qedexe yê, ne zî qerarê komkerdişê înan est o. La demo ke çekuyê kurd û Kurdîstan vîyarenê yan zî biney polîtîk bibê, qedexe kenê. Rojnameyê Yenî Yaşamî nêdanê ma. Ey zî bi baxaneyê ke rojname girêdayeyê Sazgehê Îlanî yê Çapemenî nîyo, nêdanê.”
‘Kameraya ke oda de bi ca kerda her cayî vînena’
Huseyîn Bagî dîyar kerd ke odaya ke maneno, kamera bi ca kerda û wina domna: “Seba ke kamera odaya ma ra ewnîyena, ma vernîya ci girewte. Bi baxaneyî ke ma zerar dayo kamera, çar reyî cezaya têkilîye daye ma hemînan. Nêzdîyê çar aşmî cezaya name û têkilîye daya mi. Kamera hema zî oda de ya. Nê semedî ra ma spor zî nêkenê. Cezayê cîya cîyayî yê dsîplînî daya xeylê embazan. Sewbîna demo ke ma şonê nêweşxane ma ‘cigêrayîşê fekî’ qebul nêkenê zî ma nêbenê nêweşxane û cezaya disîplînî yena dayene. Demo ke benê muayene zî ma rê kelepçeyî ferz kenê.”
Huseyîn Bagî da zanayene ke hemverê nê kerdişanê hepisxaneyî, zaf reyî muracatê gelekî sazgehan kerdo.
‘Rixmê prosesî zî vera girewteyan zilm vêşî beno’
Birazaya Huseyîn Bagî Meral Bag zî dîyar kerd ke vera nê binpaykerdişanê hepisxaneyê muracatê xeylê sazgeh, partî û rayberîya hepisxaneyan kerdo û wina vat: “Rixmê prosesê çareserî zî girewteyanê ma ser o zilm vêşî beno. Prosesêko winasînî de ke hêvîya aştî vêşî bîya, rayberîyê hepisxaneyan girewteyan rê zilm kenê. Ma wazenê no zilm biqedîyo.”
‘Çekuyê kurd û Kurdîstanî qedexe yê’
Meral Bag dîyar kerd ke çar aşmî ra ver datê xo rê kitabî erşawitî la hepisxaneyî kitabî nêdayê datê aye û nê çîyî vatî: “Seba ke zereyê kitaban de çekuyê kurd û Kurdîstanî vîyarenê, vanê ‘qedexe yê.’ Çekuyê Kurdîstanî qedexe nîyo, tarîxî de zî vîayreno. Demo ke ma hepisxaneyanê bînan rê erşawenê gênê ka nê hepisxaneyî de nêgênê. Çend reyî hepisxane de zî gêrayê la kitabî nêdîyê.”
‘Vera binpaykerdişê heqan ê hepisxaneyan bêveng memanê’
Meral Bag vengda ray pêroyî ke vera binpaykerdişê heqan ê hepisxaneyan bêveng nêmanê û qiseykerdişê xo wina qedîna: “Ganî vera nê binpaykerdişan ma sey komel bêveng nêmanê. Ma wazenê Komela Heqanê Merdiman (ÎHD), partîyê sîyasî û sazgeh û dezgehê hiqûqî nê binpaykerdişan reyde eleqedar bibê û nê binpaykerdişê heqan biqedîyê.”
