Endamê Komîsyonê Hepisxaneyan ê OHD’î Ferat Koçeroglu derheqê binpêkerdişê hepisxaneyan de, rewşa hepsîyê nêweş û heqê hêvîye qise kerd û va: “Wa Wezaretê Adaletî ser heqê hêvîye xebatan bido destpêkerdiş.”
Endamê Komîsyonê Hepisxaneyan ê OHD’î Ferat Goçeroglu derheqê binpêkerdişê hepisxaneyan, rewşa hepsîyê nêweş û heqê hêvîye ser o ajansê ma rê qise kerd.
Ferat Koçeroglu ard ziwan ke Komîsyonê Hepisxaneyan ê OHD’î xebatê xo domneno û wina va: “Ma serdayîşê hepisxaneyanê Amed, Xarpêt, Erzîngan û Erziromî kenê. Nê hepisxaneyan de nêweşê giran est ê. Tay înan nêweşê laşoganwerî yê giran ê. Ameyê daraxa peynî, ameyê nê daraxa ke eke nîyê dermankerdiş heqê înan ê weşîye nîno kerdiş. Ma şonê nê hepisxaneyan serdayîşê kenê la serdayîşê bi negatîfî netîce gênê. Demêko nêz de Hepisxaneyê Amedî de hepsîyê nêweşî yê giran ê laşoganwerî Botan Karsu estbî, nêweşîya ey daraxa peynî de bî. Nika Hepisxaneyê Ewleyî yê Berze yê Wanî yeno tepiştiş. Nêweşxaneyê Cigêrayîş û Perwerdeyî yê Gazî Yaşargîlî ameynî dermankerdiş dima ke taloqkerdişê înfazê ey betal kerdê ey erşawitî Wanî, nika nêeşkeno seba kontrolî şîro nêweşxaneyî. Hewce bî di hewteyan rayêkî şîro nêweşxaneyî û tedawîya kemoterapîye bibo. Seba ke înfazê ey bêro taloqkerdiş ma serpiro da. Nêweşxaneyî raporo ke ‘nêeşkeno bi tena serê xo cuya xo hepisxane de dewam biko’ da. Aşmêka zafêr a seba ke înfazê ey bêro taloqkerdiş ma serdayîşî kenê la ti verpers nîno dayîş.”
Hepsîyê nêweş nêresenê heqê xo yê weşîye
Goçeroglu destnîşan kerd ke hepsîyê nêweş nêeşkenî heqê xo yê weşîye zî bikar bîyê û wina qedîna: “Şertê normal de hewce yo ke hemşire şîro hetê înan, hetê weşîye hewce bibo hetkarîya înan biko. Her wina demê hepsîyan benê nêweşxanê gêrayîşî mîyanê fekî, înan rê yeno ferzkerdiş û bi nê awayî îşkenceyêka psîkolojîk înan rê yeno kerdiş. Seba hepsî îşkence qebul nêkenî, zaf rayan nêeşkenî şîrî nêweşxaneyî zî. No ser zî tedawîya înan kêm manena, nêeşkenî dermanê xo bigê.”
