Derheqê hepsê nêweşî Siddik Gulerî de qerarê texlîye ame dayene.
Heqê hepsê nêweşê giranî Siddik Gulerî yê 85 serre de ke Zindanê Tîpê T yê Îskenderûnî de tepişte bi, qerarê texlîye ame dayene. Avûkatanê Gulerî, semedê sewqkerdişê Sazîya Tibê Edlîyî (ATK) muracatê Sersavcîya Komare ya Îskenderunî kerdbî.
Guler, 20ê Hezîrane de sewqê ATK’yî bîbî. Heyetê 11. yê Îxtîsasî yê ATK’yî, raporê xo 27ê Hezîrane de amade kerd. Heyetî qerarê xo de bal ant ser raporanê nêweşxaneyî yê Gulerî û rapor goreyê madeyê “Bi sereyê xo nêeşkeno îhtîyacanê xo bivîno” amade kerd.
Sersavcîya Komare ya Îskenderunî, derheqê rewşa Gulerî de bi nuşteyêk persa “Seba komelî talûke yo?” Emnîyetî, ewro cewabê nuşteyê dozgerî da û derheqê Gulerî de va ke “Seba komelî talûke nîyo.”
Mehkema, derheqê Gulerî de qerarê texlîye da.
Heqê Siddik Gulerî de
Guler, lîsteya hepsîyanê nêweşan a Komelaya Heqanê Merdiman (ÎHD) de ca gêno û serrra 1994î ra nata tepişte yo. Guler o ke bi îdîayanê sîyasîyan ceza girewta, nêweşê tansîyonê berzî, qelbî, romatîzma û alzheimerî yo. Heto bîn ra, sebebê kalîya xo ra nêweşîyê sey xo vîrakerdiş, nêeşnawitiş û zor qiseykerdiş vejîyayê.
