Cagira Serekê ÎHD’î ya Amedî Suzan Mehmetoglu Aksoy va ke hêrişê ser keyeyê kurdî, nîşan da ke no serebût, semedê bêtehamûlî yê vera ziwanê kurdkî yo û wina va: “Wa her kes ziwanê xo qisey bikero, çimkî her kes bi ziwanê xo yeno naskerdêne.”
Goreyê daneyanê Komeleya Heqanê Merdiman a aşma çileye 14, sibate 6, adare 5, nîsane 7, gulane 15 û hezîrane 9 û bi pêroyî 56 serebûtanê nijadperestîye pê ameyî, nê daneyê aşma Hezîrane yê. Tewr peynî Stenbol de keyeyê Kaya demê agêrayîşê seyranî, seba ke wesayîtê xo de deyîranê bi ziwanê kurdkî goşdaritî, hetê polîsan ra resmê înan ameyo antiş û bi îşkenceyê ameyî destbendkerdêne.
Demê destbendkerdêne de Zeynep Yaman a dicanîye zî bîye. Çi heyf ke Zeynep Yamane zî raştî hêrişê polîsan amê, polîsan paşkul pîzeyê Zeynep Yamane ra da û no ser zî Zeynep Yaman bi rêbazê sezeryanî bi lezûbez ame amelîyatkerdiş. Telûkeyê cuye yê tutî domyeno.
Cagira Serekê Şaxê ÎHD’î ya Amedî Suzan Mehmetoglu Aksoye serebût ser o ajansê ma rê qisey kerd.
Suzan Mehmetoglu Aksoy dîyar kerd ke hêrişê ser keyeyê kurdî nîno qebulkerdiş û wina va: “Demê keyeyê Kaya agêrayîşê seyranî de deyîranê bi ziwanê xo goşdarî keno. Çi heyf ke raştî hêrişê polîsan yenî. Uca de cinîyêka diganî zî est a, a zî raştî hêrişê polîsan yena, dima zî cinîya diganîye bi lezûbez yena amelîyetkerdene. Tut, nika binê halo îstînayî de yo û rewşa ci zî nêbaş o. No serebût, bêtehamûlîya ziwanê kurdkî yo. Heqê her merdimêkî esto ke bi ziwanê xo biciwo û ziwanê xo qisey bikero. Zaf mîsal est ê ke şarê kurdî raştî hêrişanê nijadperestîye ameyî. Mîsal karkeranê ke şonî Tirkîya, seba ke ziwanê kurdkî qisey kenî, raştî hêrişan yenî. Meclîs de demo ke bi kurdkî yeno qiseykerdiş, mikrofon yeno girewtiş, no zî mîsalêkî tewr muhîm o. Meclîs de ziwanê kurdkî qebul nêkenî. No serebût pêşengîya nijadperestîyanê binî keno. Ma sey Komeleya Heqanê Merdiman nê çikan qebul nêkenî.”
‘Ziwanê şarêkî vindî bibo, o şar zî vindî beno’
Suzan Mehmetoglu Aksoy destnîşan kerd ke hêrişê ser ziwanê kurdkî tesîrî komelî zî keno û wina dewam kerd: “Ez zî sey kurdêke wazena ziwanê xo qisey bikera. Demo ke kurdî şonê şaristananê Tirkîya, nêeşkenî bi asanî û kêfweşî ziwanê kurdkî qisey bikerî. Zaf rayan tersenî ke bi ziwanê xo qisey bikerî. Her merdim ziwanê xo wa her cayî de bi asanî qisey bikero. Wa ma her cayê dinya de ziwanê xo qisey bikerî û ziwanê xo bimusî. Demo ke ma ziwanê xo qisey nêkenî, ameyox de ma do zaf raştî hêrişan bêrê. Ewro her kes bi ziwanê xo yeno naskerdene. Ziwanê şarêkî do vindî bibo, o şar zî vindî beno.”
