Artêşê tirk Botan de serra 2015î ra pey bi desan qeleqolê leşkerî dewanê ke serranê 90î de ameyê vengkerdene, ê dewan de awan kerdî. Nika çimdarîya ê qeleqolan de xozaya Botanî talan kenê.
Herêma Botanî de serra 2015î ra pey dewlete verê xo da koyanê Cûdî, Heftenîn, Herekol û Bagarî. Dewlete tîtik û quntaranê nê koyanî ke serranê 90î de bi desan dewî ameybî vengkerdene, dest bi viraştişê qeleqolan kerd. Bi viraştişê qeleqolan talanê xozaya herême ser o vejîya asta tewr berze.
Agêrayîşê dewan qedexe yo
Tîtik û quntaranê Koyê Cûdî bi desan dewî ameyê vengkerdene. Çend dewan ra vêşêr hema zî dewê Dîvîn, Cifane, Akêt, Gilindor, Spîndarok, Gundikê Remo, Nêvava, Bilga, Cilbiya, Silib, Girê Çolya, Babga, Sorbitmê, Germgê, Şemga, Dêrgê, Xinis, Hesedoka, Bêşêrê, Şax û Heblerî qedexe yê. Cayanê nê dewan de qeleqeol ameyê awankerdene û binê kontrolê nê qeleqolan de kanê komirî yenê akerene û daristanî yenê birnayene.
Bi awbend û qeleqolan Kurdîstan parçe kenê
Serranê 90î de dewê Hoze, Mêre, Dêryan, Axyan, Xwarê Şêro, Pîrane, Hîlal, Nêrweh, Hodane, Ziravkê, Kalgê, Mijîn, Şirîş, Tolgan getê dewlete ra ameyê vengkerdene. Heftenîn de zî bi desan qeleqolî ameyê awankerdene û binê kontrolê nê qeleqolan de xoza yena talankerdene. Dewlete bi awbendanê ke viraştê, wazena Qileban û Heftenînî bi nê awbendanê ewleyî yewbînan ra abirna.
Dewî veng kerdî, herinda înan de qeleqolî awan kerdî
Herêma Besta û quntarê Koyê Herekolî de demo ke bena şewe, roşnîya qeleqolan leşkerîyan ra vêşêr çîyêk nêaseno. Seranserê herême de qeleqolî ameyê viraştene û nê qeleqolî cayanê dewanê sey Avyan, Kenî Ferşkê, Xirbê Bestê, Kenî Sîvgê, Behra Hincê, Çala, Sergê Mehemê Oso, Kela, Çemkê Tehlo, Bacît, Giregê, Romaran, Kûrta Xanê, Tûşimya, Cinîwer, Bişiyê Reş, Zirvî, Bolûzer de ameyê awankerdene. Nê dewî heme kewenê mîyanê Herêma Besta û cerdevanê herême heme daristanê nê dewan birnayî.
